DIARIO a haya e honor di a pasa den un experiencia fabuloso cu Orua Toastmaster Club

ORANJESTAD (AAN)-- Diabierna 7 di Augustus, Matutino DIARIO tabata tin e honor di a forma parti di e grupo di invitadonan y

miembronan di Orua Toastmaster Club, di Toastmaster Internacional, cual Presidente ta señor Ursell Arends y señora Tamarah Arends Croes ta su Vice President Membership. Nan sede ta ubica na Hyatt Palace.

E tabata un experiencia sublime, hopi interesante, den un ambiente di colegialidad hopi positivo, educativo, ameno y versatil.

“Riding the Wave of Growth” tabata e tema di e anochi aki, den cual toastmaster Faridi Abdul- Hamid y toastmaster Sergio Helder, a presenta cada un, un tema propio cu cual nan a logra capta e atencion di e presentenan, mustra nan habilidad di crea contenido di un tema, papia cu fluidez dilanti e publico.

Faridi su tema ta “Siñando nabega mi voz” basa riba strategianan di motivacion, y Sergio a traha un storia yama “Di Hulk pa Bruce”, enfoca riba con pa resolve un problema entre dos persona, sin cay den violencia, pero  logre cu un actitud pacifico y positivo.

Tur dos tema a wordo evalua. E tema “Siñando nabega mi voz” a wordo evalua pa toastmaster Francis Groeneveldt, y “Di Hulp pa Bruce” pa toastmaster Michele Brook. E tema aki a resulta ganador, e presentenan a emiti nan voto.

Seguidamente, cada presente (miembro y invitadonan), a bay dilanti pa scoge un pregunta na “azar” pa adapte na un situacion personal. Esey ta yama “table topics”. E contestanan aki tambe a bay den votacion y e ganador ta Aaron Ruiz, cu a enfoca riba empathy.

Pa ultimo a puntra cada persona presente, con nan a haya e anochi aki y tur hende a contesta cu entusiasmo, palabranan manera excelente, maraviyoso, versatil, interesante, sublime, entre otro.

Finalmenter, Presidente Ursell Arends y Toastmaster of the Meeting Jacky Filiciana a dirigi palabra gradiciendo e presencia y acogida di esnan cu a “nabega” cu nan y participa den e experiencia di e anochi aki. Y pa clausura, tur hende a lanta para warda un minuut di silencio na memoria di e hoben Mingli Chung, ex-miembro di Oruba Toastmaster Club, cu recientemente a fayece.