Dialuna ta cuminza construi Proyecto ‘Mini Wastewater Treatment Plant’ na Mangel Halto

ORANJESTAD (AAN): Departamento di Obra publico kier a informa comunidad di Aruba specialmente habitantenan di e area di Mangel Halto,

cuminsando Dialuna awor 14 di augustus 2023, DOW lo bay cuminsa cu un proyecto na Faradaystraat unda cu lo bay pone un “Mini WasteWater Treatment Plant” den vloer pa asina preveni e awa cu no ta trata di bay lama actualmente.

   E obhetivo di e proyecto akinan lo tin diferente beneficio manera:  (*) Pa nos medio ambiente: Lo elemina/reduci awa contamina cu ta bayendo lama.  (*) Pa salud: Mehora e calidad di awa pa asina den futuro e por worde uza pa agricultura y irigacion di nos vegetacion;  (*) Economico: Lo haya un crecemento den turismo como tambe, e area lo worde embeyece.

   E “Mini Wastewater Treatment” akinan lo ta un tecnologia di VFL unda cu e Wastewater treatment lo worde instala den vloer. E tecnologia akinan tin mas cu 70.000 planta den uzo na mas di 50 diferente pais.

   Manera a menciona, DOW lo cuminsa dialuna awor y ta proyecta pa caba den October 2023.

   Diaranson DOW a hasta tene un ‘Town Hall Meeting’ pa e habitantenan di e area, pa asina informa nan kico tur e proyecto ta encera. Mester menciona cu e habitantenan a keda contento cu nan a worde informa y tambe involuncra pa asina duna nan opinion y contesta tur preguntanan cu nan tabata por tin.

   Por ultimo Wattsstraat of e area cu habitantenan/turista ta frecuenta pa bay landa, lo no worde cera. Solamente Faradaystraat lo worde cera parcialmente durante ehecucion di e proyecto akinan.