Pronostico temporada pa horcan a cambia!

Informacionnan di DIARIO riba discrepancia pronosticonan confirma

• National Hurricane Center ta aumenta cifranan anterior pa 2023
• Teoria Colorado State University El Niño vs. oceano cayente corecto 

ORANJESTAD (AAN)- Mundo ta drenta un fin di siman cu temanan sumamente importante causando impacto y DIARIO atrobe ta duna prueba di ta presenta informacion corecto na Pueblo di Aruba conforme su deber periodistico.

Informacionnan cu a wordo ricibi ayera ta indica cu National Hurricane Center, cu ta e autoridad riba tema di horcan pa region di Caribe y Oceano Atlantico, a ahusta su pronostico y awor ta cay den e linea presenta pa Colorado State University, caminda alumnonan di Professor William Grey ta sigui cu e labor di e pionero riba tereno di pronostico di horcan.

Algun siman pasa, DIARIO a presenta e rapport di Colorado State University cu a mustra cu e actividad di horcan durante e temporada di horcan 2023 lo tabata riba normal aunke na 2023 El Niño ta manifesta su mes.

El Niño ta e fenomeno di tempo den Oceano Pacifico cu ta percura pa e coriente na nivelnan mas halto di atmosfera crea condicionnan negativo pa formacion y crecemento di sistemanan tropical den nos region.

Den e pronostico original di National Hurricane Center e fenomeno aki tabata e punto central, cu ta basa riba berdad di e condicionnan climatologico cu ta presente na 2023.

Sinembargo, e pronostico di Colorado State University a mustra cu na 2023 mester tene cuenta cu Oceano Atlantico cayente lo permiti mas tormenta y horcan desaroya nan mes, lo lo afecta e impacto di El Niño.

DIARIO tabata pendiente di informacion oficial di National Hurricane Center, manera el a anuncia y awor por informa Aruba cu National Hurricane Center a cambia su pronostico y ta spera un temporada activo di horcan pa region di Caribe, Golfo y Costa Mericano na Oceano Atlantico.

Ta trata aki pues di cambio oficial di e pronostico pa e region Atlantico Norte.

Segun National Hurricane Center e region di cual Aruba tambe ta forma parti awor por spera 14 pa 21 tormenta cu ta haya nomber, di cual 6 pa 11 ta bira horcan y 2 pa cinco ta bira horcan mayor.

Cambio di clima ta expresa su mes completamente den e cambio historico di pronostico di National Hurricane Center cu asina ta cuadra awor cu e rapport di pronostico di Colorado State University y e alumnonan di pionero William Grey, cu a presenta un pronostico di 18 tormenta cu lo haya nomber, 9 cu lo bira horcan y 4 cu lo bira horcan mayor.

DIARIO lo sigui informa Aruba riba e informacion den cual cifranan cu ta inclui sistemanan cu ya a presenta na 2023, cu ta crea e indicacion di un trankilidad cu manera e calor inmenso ta indica, ta falso y solamente ta entrada pa un temporada di horcan activo manera awor tanto National Hurricane Center como Colorado State University ta mustra.

Region di Caribe mester ta pues bon prepara pa e temporada 2023 cu segun pronostico lo mira alrededor di mitar di e total di sistemanan pasa den region di Caribe!