Dialuna awor Adelaida Ponson-Arends ta presenta 2 buki na Biblioteca

ORANJESTAD (AAN): Dialuna awor, 24 di April, señora Adelaida Ponson-Arends ta presenta 2 buki na Biblioteca Nacional Aruba.

   E evento ta di 5’or pa 7’or. Cu mucho gusto señora Adelaida ta conta publico un tiki mas di su publicacionnan. Publico ta bon bini.

   Señora Adelaida Ponson-Arends a publica su memoir titula ‘Recuerdonan stima’ na 2019. Como cu tabata un temporada dificil pa organiza evento publico, señora Ponson no a presenta ‘Recuerdonan stima’ oficial. Awor señora Adelaida a publica otro buki titula ‘Tempo di miedo’. Cu mucho gusto señora Adelaida Ponson-Arends ta presenta tur dos na publico.

   Recuerdonan stima: Señora Adelaida Ponson-Arends a traha un aña riba e proyecto aki di selecta potret y skirbi textonan pa por compila su memoir cu recuerdonan di su mayor y rumannan. Señora Adelaida a nace na 1944 na Companashi y e tabata prome yiu di pareha Gilberto y Maria Arends.

   E publicacion ta ilustra pa hopi potret for di e album di famia. E lesador ta haya un bon impresion di un famia Arubiano di antes y tambe algun costumber di antes.

   Señora Adelaida Ponson-Arends a laga print un oplage chikito di 50 ehemplar mas tanto pa famia, amigo y conocirnan pero e ta na benta tambe na Plaza Bookshop despues di dia 24 di april. Usuarionan di biblioteca por consulta of fia e buki na biblioteca.

   Tempo di miedo: Segun señora Adelaida “esaki ta un storia y relato cu ta desaroya den un temporada bastante dificil, esta di Corona. Sperando cu e buki por refleha un tempo involvidabel cu nos na Aruba y henter mundo a pasa aden y cu a siña nos un les pa semper. Pa aprecia locual nos tin y pa conserve, pasobra e ta precioso!”

   Maraca: Señora Adelaida tambe a contribui cu un storia na e publicacion ‘Maraca’. Esaki a keda publica na maart 2023 na biblioteca.

   E evento ta di 5’or pa 7’or y tur hende ta bon bini.