Ministro Geoffrey Wever:
ORANJESTAD (AAN): Desaroyo di un pais chikito, manera Aruba, mester di un vision ambicioso y a base di un plan coordina, unda ta tene cuenta cu desaroyo actual riba nivel local, pero tambe mundial.
Un meta comun, unda miho calidad di bida pa nos ciudadanonan, desaroyo y diversificacion economico, social y di medio ambiente ta keda primordial.
Cu e proposito aki, a traha riba un plan cu a considera temanan importante pa nos sigura cu Aruba como isla por keda un pais placentero y prospero pa biba. Por ehempel, producion di awa y cuminda ta esencial pa nos por sobrevivi. Pero tambe como pais ta esencial cu nos por suministra nos mesun cuminda y energia (coriente) mas cu ta posibel, asina reduci nos dependencia riba importacion. Como tambe ta importante pa awa, cuminda, energia y material pa construi nos hogar por keda pagabel.
Considerando e factornan aki, a formula un plan di accion nacional ‘Aruba su Transicion pa un Modelo Economico Sostenibel y Inclusivo 2023-2025’. A formula un total di 13 proyecto basa riba e temanan di: awa, cuminda, energia, construccion y sostenibilidad den comercio. Ta asina cu tambe lo mester considera e manera cu negoshinan ta opera y nan impacto riba nos comunidad y medio ambiente.
Cu e meta di stimula e siguiente sectornan: produccion di awa y coriente, agricultura comercial y construccion sostenibel, lo enfoca riba promove conocemento y tecnologia alternativo, esta ‘green technologies'. Asina lo haci posibel, eficiencia y desaroyo na un costo mas efectivo, reduciendo costo di bida.
E proyecto aki no ta solamente un proyecto di un ministerio pero di henter gobierno di Aruba pa henter Aruba y cu ta rekeri participacion y colaboracion di diferente ministerio por ehempel, ministerio di naturalesa, ministerio di infrastructura, ministerio di energia, entre otro. E plan aki ta e prome fase unda a habri e caminda pa cuminsa e dialogo y enfoca riba e temanan cu ta importante pa nos calidad di bida na Aruba.
Minister Geoffrey Wever ta invita un y tur pa lesa e plan cu ta accesibel riba e website di Departamento di Economia, Comercio y Industria (deaci.aw) y asina aporta na e transicion pa un Aruba mas sostenibel y inclusivo.
