Dialuna 11 di November anochi a lansa e website oficial di Carnaval 71

Darren van Ommeren a splica:

ORANJESTAD (AAN) – E fecha 11/11 ta uno hopi spera ya cu ta marca e inicio di e temporada dushi di carnaval. Manera DIARIO a publica caba den su edicion di Diasabra caba, Carnaval 71 ta bay bira grandi y hopi exitoso. Esey, segun informacion duna pa Darren van Ommeren.

            Van Ommeren a agrega cu pa SMAC ta importante cu e actividad cultural mas grandi di Aruba, henter pueblo disfruta di dje, y participa di dje na un of otro manera.

            E programa, pa loke ta e actividadnan oficial di SMAC ta cla y nan a publica esaki un par di luna pasa, tur schedule cu ta encera Festival di Tumba, eleccionnan di reina, Calypso y Road March infantil y hubenil, y tur e paradanan cu tin.

            Den e simannan cu ta bin nan ta bay hinca den otro tur e actividadnan adicional, manera palabra escolar, bacchanal brunch, sunset parade, y cu nan ta bay hinca den otro pa arma e schedule. “Pero schedule pa loke ta carnaval 71 ta cla y ta hinca den otro caba”, Van Ommeren a reitera.

            E apertura di Carnaval 71 a tuma lugar Dialuna 11 caba, y carnaval ta caba dia 2 di Maart ora cu nan ta kima e Momo. Pa loke ta e gruponan nan a bira 'sold out' caba, y hasta tin lista di spera.       Registracion di e gruponan no a tuma lugar ainda mirando cu SMAC a lansa un website dialuna anochi, na e actividad oficial na Centro di Bario Noord.

            “E website aki ta bira un 'one stap shop' caminda cual ta bay tin tur informacion, tur calender di carnaval y tur hende cu lo participa sea den eleccion di Reina, Prins y Pancho, festival di tumba, festivalnan di mucha, etc. Gruponan di carnaval por subi riba e website aki,  bay na e 'red station tap', click riba dje ye na nan form y registra eynan”, Darren Van Ommeren a informa.