Diadomingo awor tin competencia di Tiro na Wela

Pa esnan cu ta carga arma legal na Aruba

ORANJESTAD (AAN): Den un entrevista cu Giovanni Heyliger, el a elabora riba un Competencia di Tiro cu tin planea pa tuma lugar Diadomino awo, 22 di Juni 2025 na tereno di tiro na Wela.

   Esaki ta un campeonato cu Heyliger ta organizando pa 20 aña caba cu exito, y e ta contento cu tur e sosten cu el a bin ta ricibiendo tur e añanan ey.

   E competencia di Defense Police Person Competition ta ser teni un biaha pa aña, ta wordo combina cu algo extra e dia ey, esta cu despues di tiramento tin Barbecue, cos di refresca garganta, entrega di premio cu e.o. medaya.  Pues na final tur hende ta bandona Wela hopi contento.

   Segun Heyliger, e competencia ta Diadomingo 22 di Juni, for di 8:30 am kizas te banda di 11:30 am.  E ta pa tur hende cu ta porta arma legalmente, esta e.o. Polis, Kia, Wardacosta.  E biaha aki a invita tur esnan cu ta transporta placa, y tambe esnan cu ta bezig ta train pa bira miembro.  El a mustra cu a habri inscripcion tambe pa e aspirantnan nobo na Scol pa Polis, pasobra nan tambe mag di tira.

   E organizador Heyliger tin confianza cu Diadomingo awor lo tin un grupo grandi ta participando, pasobra e ta algo bon pa nan mes, pasobra nan cu ta cana tur dia cu e arma, awor ta un chens pa sigui mustra con bon nan ta uze, y mehora bo precision, den e distancia di 4 meter pa 25 meter.  Aki ta unda cu nan lo competi y saca e mihor den precision na Aruba.

   Si e Dienst ta permiti, e participantenan lo por bin cu nan arma di trabao.  Si acaso esey no ta e caso, na Wela mes lo bay tin arma disponibel cu nan por uza.

   Hopi compania local si ta laga nan empleadonan di Security bay competi cu nan arma, y esey ta algo cu Heyliger ta haya ta hopi bon.  Nan ta siña conoce nan arma miho.

   Pa e competencia di Diadomingo awo, tin hasta un Premio special pa Teenagers.

   Deporte di Tiro: A puntra Heyliger con ta bayendo cu deporte di tiro.  El a splica cu Deporte di Tiro na Aruba ta wordo practica bao di IPSC (International Practica Shooters Confederation), y en general e ta bayendo bon.  Na September venidero tin Aruba Open.

   Na aña 2026 nan ta prepara pa prome biaha den historia, cu Aruba lo organiza e evento internacional cu ta un Competencia Panamericano.  Aki lo bay ricibi 500 pa 600 tirado di exterior.  Segun Heyliger, nan tin un comision trahando riba henter e competencia, incluyendo un grupo cu ta trahando y preparando e cancha pa e evento Panamericano.

   E competencia Panamericano aki lo bira grandi, mirando e hecho cu hopi biaha promedio di mitar di e competidornan lo viaha y bishita e lugar aki cu nan famia.

   Heyliger a indica cu aworaki tin algun hoben cu ta ricibiendo training di Tiro.  El a splica cu en realidad nos mester di e deportistanan hoben den Tiro.  El a agrega cu e miembronan existente “ta birando grandi” y no “tin e speed manera antes”, y pesey ta mustra cu e Deporte di Tiro tin speransa di por haya mas miembro hoben.

   Esnan cu kier participa, por djis yega Diadomingo awor na Wela pa inscribi y participa.  Hobennan cu lo kier cuminza train pa deporte di Tiro, tambe por ricibi informacion for di directiva di Aruba Practical Shooters Club cu lo tey presente.  Por papia eynan cu e.o. Kenneth Lacle, kende lo duna tur informacion di e proceso pa por bira miembro.