MEP a reconoce servicio di Miss Universe di bishita

Parlamentario Evelyn Wever-Croes

• Tambe proyecto di Miss Universe Aruba Anouk Eman den sostenibilidad 

ORANJESTAD (AAN): Parlamento di Aruba tabata tin un encuentro cu Miss Universe cu ta na Aruba pa un Caribbean Tour. Meta di su bishita ta pa papia di e metanan di desaroyo sostenibel di Nacionnan Uni, e asina yama Sustainable Development Goals (SDG).

  “Mi ta comparti e lucha pa SDG’s, algo cu mi a para fuerte p’e durante cu mi tabata Prome Minister di Aruba y cu mi lo sigui sostene desde Parlamento awor”, Evelyn Wever‑Croes a declara  Durante e encuentro den Parlamento el a wordo acompaña pa Anouk Eman, Miss Universe Aruba 2024. Anouk a sali Silver Finalist den Voice for Change cu su proyecto “Iron Women”, un proyecto cu ex Prome Minister Wever-Croes ta sumamente orguyoso di dj’e mirando cu el a tuma parti activo den dj’e. 

   Parlamentario Wever‑Croes den un combersacion breve cu Miss Universe a enfatisa cu e metanan di desaroyo sostenible SDG’s ta crucial pa Aruba. Como un “Small Island Developing State”, Aruba ta sinti e efectonan di cambio climatico. Nivel di lama ta subi, tempestadnan extremo, y sargassum cu ta infesta nos costanan. “Pa nos na Aruba, e SDG no ta simplemente algo ‘nice pa nos tin’, sino e ta un “must” pa nos sobrebibi.  P’esey mi no ta cansa di pidi paisnan mas grandi y esnan cu ta emeti y susha mas pa nan keda comprometi na e compromiso cu e metanan di SDG”.

   Durante su periodo como Prome Minister (te maart 2025), Wever‑Croes no a solamente boga pa SDG na Aruba, sino tambe na nivel mundial: na Nacionnan Uni y na Union Europeo pa mantene na e mesun agenda di sostenibilidad.

   “Mi mensahe principal na Miss Universe ta; cu pa nos logra e metanan di SDG, nos mester haci e esfuerso global, paisnan chikito manera Aruba no por logra su so , y p’esey mi a pidie pa yuda nos hiba e mensahe aki rond mundo” Evelyn Wever-Croes a duna di conoce