Cinco trahado di Registro Civil y Censo a haya nan decreto gubernamental como ambtenaar

Despues di añanan laborando:

ORANJESTAD (AAN):   Diahuebs, Registro Civil y Censo a celebra un hecho importante. Un grupo di trahado a huramenta y a haya nan decreto gubernamental como ambtenaar. A expresa cu huramenta ta e momento di mas special pa cada ambtenaar y su rol ta importante den nos sistema di estado di derecho constitucional.

            Huramenta ta stipula pa ley y ta sumamente necesario pa un fundeshi solido como sirbido publico den un organisacion gubernamental profesional. E ambtenaar ta hura di sirbi su Pais cu cuerpo y alma, atene su mes na su Constitucion y reglanan, sin spera nada a cambio, y ta hura cu lo traha cu integridad na bienestar di su Pais. E no ta solamente un recordatorio di su responsabilidad y obligacion como sirbido publico di Pais Aruba, pero tambe di e honor di ta un sirbido di bo Pais.

            Bou mandato di Gobernador di Aruba a huramenta dilanti di hefe di Censo dia 11 juni 2025 e siguiente personanan, cu despues di añanan laborando na Censo a haya nan decreto gubernamental como ambtenaar. Ta trata di: Marjetie Lai-Ping Franzy Hsing, Imelda Patricia Hughes, Geraldine Natisha Keteldijk, Emily Janice Lopez, y Ludwig Jairzinho Rincones.

            Manera ta conoci Censo ta traha bou mandato di Gobernador pa locual ta trata paspoort Hulandes y den estrecho cooperacion cu Gabinete di Gobernador. Pa es motibo tin un convenio di seguridad di paspoort, cual entre otro ta exigi cu tur ambtenaar di Censo mester ta huramenta. Cumplimento cu e convenio aki ta wordo audita tur aña.

            Den e transcurso di añanan cada vez Censo a sa di logra saca un audit positivo y un rating hopi halto compara cu cualkier municipio na Hulanda. Algo cu Censo ta orguyoso di dje y di cual ta esfuerzo di full e team.

            E team di Censo ta felicita nan 5 colega cu nan huramentacion y desea nan tur exito den nan carera como sirbido publico.

\