Diadomingo awor Fiesta Rotaria ta bek despues di 3 aña

Ta bay ta e di 40 edicion

ORANJESTAD (AAN): Despues di un ausencia di 3 aña, e famoso Fiesta Rotaria di Rotary Club of Aruba ta bek.

Durante un conferencia di prensa presidente di Rotary Club of Aruba Shelby Maduro a splica cu e feria ta bay tuma lugar Diadomingo awor dia 2 di April den parkinglot di Stadion Guillermo Prospero Trinidad.

Ta bay ta di 40 edicion di Fiesta Rotaria .

E famoso mercado ta bay ta bek, unda cu bo por cumpra tur tipo di articulo di cas, articulo personal y mas.

Banda di esaki e popular ‘Dunk Tank’ ta bay tey un biaha mas, unda cu personanan conoci den comunidad ta dispuesto di wordo benta den awa pa un bon causa.

Manera semper ta e caso lo bende e rifa tambe, cu cual hende por gana diferente premio hopi bunita cu ta inclui entre otro un auto Chevrolet Groove di 2023, dos pasashi pa Medellin y mas.

Benta di e rifa a cuminza caba for di temporada di Carnaval.

Tur fondo recauda lo wordo uza pa yuda diferente fundacion y organizacion den nos comunidad.

E ganadornan di e rifa ta wordo saca pa 5’or di atardi.

Fiesta Rotaria cu ta bay ta di 10’or di mainta te cu 6’or di atardi ta inclui tambe gruponan di diferente restaurant cu lo ofrece dushi cuminda na bon prijs, mientras cu e bar ta bay ta bon surti.

Tur tipo di cos dushi manera bolo tambe ta bay ta na benta, mientras cu ta bay tin bon entretenimento musical durante henter e dia.