Marilyn Wout PR di DIMAS, maneho nobo ta stipula:
*E no mester bay DPL mas
ORANJESTAD (AAN) – Den entrevista Marilyn Wout, Relacionista Publico na Departamento di Integracion, Maneho y Admision di Stranhero (DIMAS), el a elabora tocante e maneho nobo cu a drenta na vigor.
Den e maneho nobo a bin acerca, por ehemplo, cu personanan cu tin cinco aña of mas legal na Aruba, sea cu un permiso of un declaracion, si nan ta desea di traha nan por acudi directamente na DIMAS. Kiermen, nan no mester pasa mas na Departamento Progreso Laboral (DPL).
“Esaki ta nifica cu, si por ehemplo, un persona tin un permiso di casa, durante e cinco añanan pasa e no tabata tin permiso pa traha y aworaki e ta dicidi cu e kier traha, e por acudi directamente na DIMAS, y pidi pa un permiso pa traha” Wout a subraya.
Wout a sigui bisa cu e enfoke mas tanto ta riba e trayecto alternativo di legalizacion. “Un di e condicionnan ta cu si e persona ta bay traha, e mester presenta un resultado positivo di DPL y e rekisito primordial ta cu el a drenta di forma legal na Aruba; pues, cu no a drenta di forma clandestino”, PR di DIMAS a señala.
El a agrega cu e trayecto alternativo di legalizacion, a inicia caba algun aña pasa, pues prome cu e gobernacion actual. “Esaki ta algo cu ta cana den full e buki di maneho nobo, si e persona tin un overstay, pues si el a keda mas tempo di loke ley ta dun’e pa e keda, si e lo kier residencia su mes na Aruba y tin un cupo laboral p’e, dus cu un persona local no ta ocupando e cupo ey, y e haya e documento positivo di DPL, e lo por aplica pa un permiso na DIMAS y e lo por bin na remarca na dje, si e ta cumpli, naturalmente, cu tur e otro rekisitonan; por ehemplo, cu e no ta un peligro pa comunidad di Aruba.
