ORANJESTAD (AAN): Tabata pa 1:13 pm cu diferente hende na Aruba a sinti un sacudimento basta fuerte.
Yamadanan a drenta for di Noord, Ponton, Alto Vista, Oranjestad, San Barbola, Santa Cruz, y tambe di Pos Chikito.
Un temblor enberdad a worde registra, y su epicentro a worde localiza na 12.55º Nort y 71.02º West. Esaki ta riba lama, net 104 km directamente west di Eagle Beach. E ta como 20 kilometer panort di Monkey Islands. E ta hopi cerca di costa Colombiano.
Segun sismogramnan instala na Colombia, su magnitud ta uno fuerte, esta di 4.7º riba Scala di Richter. El a worde localiza na un profundidad di 79 kilometer bao di superficie.
Hopi lugar na Aruba a sinti esaki. Algun a nota con e piso bao nan pia ta tril. Otronan a sinti con bentana tabata bati masha fuerte mes. Otronan a tende con e dak di zink a keda produci un sonido cu masha poco biaha nan ta tende.
Ningun registro a drenta di daño causa na Aruba.
