Diadomingo anochi por mira Thessaly Zimmerman competi pa Miss Universe 2021

ORANJESTAD (AAN): Falta poco pa e certamen di beyeza mas importante di mundo, pa asina eligi Miss Universe 2021.

   E certamen di Miss Universe 2021 ta yegando cerca pa e competencia final, unda e reinanan di beyeza mas destaca di rond mundo lo bay mustra e mihor di nan talento den e certamen historico aki.

   Pa Aruba, e beyeza local Thessaly Zimmerman ta dunando un bon papel pa representa e isla na e ciudad di Eilat na Israel.  E ta haciendo su best pa purba trece e corona pa su isla, y e por logra esey mirando cu Thessaly tin experiencia amplio riba escenario, y tambe a haya un riguroso preparacion.

   Ademas di esey, Thessaly ta un hoben bon studia y ta dedica su mes hopi pa busca solucion pa problemanan cu ta afecta sociedad, incluyendo e topico di Salud Mental.  Algun tempo pasa el a promociona e plataforma di Salud Mental. Esaki ta ademas e plataforma cu Thessaly a escohe y ta boga p'e, durante e competencia di Miss Universe na Eilat, Israel.

   Zimmerman a anuncia su colaboracion cu diferente stakeholders den e tereno di cuido di salud mental y adiccion, y a bin cu e idea pa organisa un actividad cu ta ofrece tur hende e oportunidad di participa y alavez ricibi informacion valioso entorno salud mental.  A pensa di promove e aña aki e uso di arte, como herment pa yuda cu salud mental. Manera ta conoci, arte ta wordo usa den diferente forma, den e cuadro di cuido di salud mental.

   Awor cu e certamen di Miss Universe a tuma un rumbo diferente, celebrando su di 70 aniversario, nan ta busca pa destaca no djis e beyeza di e muher, sino su capacidadnan y su desempeño humano, y pesey e finalistanan mester contesta preguntanan den cual nan lo wordo poni den diferente situacion di e bida of di sociedad.

   E certamen di Miss Universe 2021 lo bay ta completamente en vivo, Diadomingo 12 di December 2021, y na Aruba por mire via TV pa 8:00 pm.  Pueblo  por mira e señal original/sonido via Fox5 Mericano riba CableTV (incluyendo High-Definition), como tambe Telemundo, of riba e website di Missuniverse.com