Diabierna awor lo tin e ultimo Rosario Bibo na Alto Vista

ORANJESTAD (AAN): Diabierna awo, 19 di november, lo tin otro Rosario Bibo na kapel di Alto Vista pa 7 or y mey di anochi.

            Esaki lo ta e ultimo Rosario pa e aña aki, debi cu proximo lo mester a tuma luga den e siman di preparacion pa Pasco di nacemento.

            Comision organisado ta invita tur hende, hoben y adulto, pa asisti na e Rosario Bibo diabierna awo.

            Cada persona por presenta su peticion(nan) individual y hunto lo resa tambe pa felicidad, salud y paz den cada cas di famia na Aruba.

            Tambe lo gradici pa tur bondad ricibi te awo den aña 2021 y pa nos ta conforme cu loke por a pasa, sea ta malesa of morto den famia. Tata su amor ta grandi y incondicional y lo no bandona su yiunan niun momento.

            Ban resa pa tur enfermo, nos grandinan, pa esnan cu no tin trabou, pa tur cu ta den necesidad spiritual y material, pa mayornan, pa tur mucha y tur cu ta traha pa bienestar di nos isla.

            Pues un invitacion na un y tur pa asisti na e Rosario Bibo diabierna 19 di november na kapel di Alto Vista.