Dia di Adopcion di Fundacion Nine Lives

Diadomingo 6 di November

ORANJESTAD (AAN): Geraldine Kock di Fundacion Nine Lives a indica cu diadomingo awo, dia 6 di November nan a organiza un Dia di Adopcion y Plant Sale. Esaki lo tuma lugar di 10'or di mainta pa 4'or di atardi. E motibo principal cu nan a organiza e dia aki ta pasobra nan tin 197 pushi. Esaki ta un cifra record pa e fundacion.

Segun Geraldine, den ultimo dos luna nan ta haya pa dia 6 pa 7 hende dilanti di fundacion, cu 6 pa 7 pushi. E ta kere cu esaki por ta pa diferente motibo, manera costo di bida a subi y ya hopi hende no por afford pa mantene nan mascota.

E ta pidi comunidad pa pasa cerca nan y adopta un di e pushinan, nan mes no por sigui cu nan esfuersonan pa rescata mas pushi, pasobra nan a surpasa nan limite pa cuida nan.  Fundacion Nine Lives ta situa na Jaburibari 8B, Paradera.

Geraldine a splica cu pushi ta den oranan di anochi of mainta trempan so nan ta riba caya, y nan ta estima cu actualmente tin alrededor di 7 mil pushi riba caya. Esaki ta un problema pasobra tin hende ta keha cu pushinan di caya ta drenta nan cas y horta cuminda y marca na teritorio. E solucion pa e problematica aki ta pa steriliza e pushinan, como tambe pa doñonan di pushi steriliza nan mascota. E tambe ta kere cu mester tin mas concientizacion den comunidad pa e cuido di pushinan y importancia di sterilizacion.

E prome 10 hende cu adopta un pushi, no lo paga e tarifa di adopcion. One Love Foundation a sponsor e tarifa aki, pero solamente pa e 10 prome persona cu adopta un pushi riba e dia aki.