Alvin Molina ta sinti cu awor e cruzada di Bernhardstraat y Lagoweg a bira mas safe

ORANJESTAD (AAN): Seguridad den trafico sigur ta un punto di atencion pa nos aki na Aruba.

Pa luna tin alrededor di 1000 accidente. P’e aña ki nos a conoce 10 morto den trafico. Den reunion cu director di DOW,  sr. Marlon Croes, el a indica cu pa nos logra un siguridad optimal den trafico nos mester tin un bon balans entre tres factor:  infrastructura, controlnan den trafico y educacion di pueblo.

   E crusada Bernhardstraat - Lagoweg, net pabou di Aruba Carnival & Entertainment Village na San Nicolas, ta uno hopi peligroso. Hopi accidente ta pasa, hende tin miedo pa haci uzo di e caminda. Simplemente bo NO por mira trafico cu ta biniendo di pabou, subi e crusada cada biaha di nobo ta un gamble bo ta tuma cu bo propio  bida y bida di otronan. Pesey na october aña pasa mi a presenta un mocion na Gobierno pa construi un rotonde na e crusada aki.

   Director di DOW, sr. Croes a splicami dos punto cu mester tene cuenta cune pa cu e proyecto aki. 1. Gastonan concerni y 2. e permiso pa traha algo grandi riba e caminda, cu ta cay bou di “PPP project Green Corridor”, por tuma hopi tempo pa worde ehecuta. Tin un otro manera cu nos por logra e mesun meta, mas siguridad riba e crusada aki, ta door di construi un “verkeersplateau” dilanti Springfield supermarket. Sr. Croes a bay haci su huiswerk y a sinta cu su stakeholders y mi ta contento cu awe e dia a yega cu e verkeersplateau ta worde traha.

   Un aviso, vooral na automobilista cu tin costumber di pasa riba e caminda aki, tene cuenta cu e cambio aki pa evita daño na bo auto door di velocidad halto. Di mi banda mi kier gradici Minister di Infrastructura,  DOW y su stakeholders pa haci nos trafico mas sigur pa tur.