Dia  26 di Juni ta dia internacional contra abuso di droga y traficacion ilicito

ORANJESTAD (AAN):  Diabierna, Fundacion Anti Droga Aruba (FADA) a tene un conferencia di prensa caminda Rish-Ann Ammerlaan,

Trahador Preventivo di e fundacion a duna di conoce cu dia 26 di Juni proximo lo ta dia internacional contra abuso di droga y traficacion ilicito.

Riba e dia aki, mundialmente ta enfoca pa concientisa riba e abuso di droga y tambe riba e traficacion ilegal. Abuso di droga y trafico ilegal tambe ta sosode cu

droganan legal manera alcohol, tabaco y remedinan prescribi, a bisa.

Ora di papia riba droganan ilegal ta pensa riba ecstasy, cocaina, marihuana y diferente otro droganan.

Uzo di droga por trece cu ne diferente problema manera problema social, financiero, economico y problemanan di salud mental. Un persona cu ta haci uzo di droga

por yega na e punto cu ta bay depende fisica y mentalmente di un substancia legal of ilegal.

Ora ta papia di dependencia ta papia di adiccion. FADA ta traha durante e aña riba e area di prevencion pa purba combati uzo y abuso di droga, Ammerlaan a indica.

Ora cu ta papia di traficacion ilicito por pensa riba benta y intercambio di productonan ilegal.

Na e rueda di prensa a invita varios organisacion cu tambe ta traha riba e mesun meta cu ta combati e uzo y abuso di droga como tambe e traficacion ilicito.

A conta cu presencia di Jeannette Richardson di CMMA. Tambe Arthur Comenencia di FMAA.

Cindy Lacle di FADA a agrega cu  nan ta kere 100% cu prevencion ta e yabi. Hopi biaha ta conciente riba e sorto di droganan cu tin y e consecuencianan. Ta importante pa comunidad ta conciente cu FADA tey y ta trahando riba e areanan aki y riba e area di prevencion, Lacle a splica.

FADA ta pone enfasis hopi pa lanta hobennan resistente pasobra ta bay yega un punto unda cu tur esaki nan lo topa un dia y pesey ta importante pa nan siña e hobennan bisa no pero siña nan pakico nan ta bisando no, e trahador preventivo di FADA  a remarca.

Adiccion ta algo sumamente peligroso, algo mortal unda tur cos ta cuminsa na purba y den forma experimental.

Pesey FADA ta kere cu ora ta cuminsa cu prevencion a bay wak e frutonan, por ta no di biaha, pero a largo plazo ta bay wak cu esaki ta duna fruta.

Aparte di duna charla, duna informacion y programanan, pa ya mas cu un aña ta duna un servicio cu nan ta yama Motiveer  unda nan ta duna motivacion na hobennan cu problematica social y cu ya a cuminsa un tiki mas cu no solamente purba of experimenta. E hobennan aki ya caba ta un problematica y pesey FADA ta brinda ayudo na e hobennan y ta trahando riba un programa nobo cu pronto lo wordo anuncia, Cindy Lacle a duna di conoce