Magaly Brito: - ORANJESTAD(AAN): Diabierna mainta SEPPA a tene un conferencia di prensa, pa reacciona riba locual recientemente minister demisionario di Enseñanza Rudy Lampe a bisa di OAA.
Segun Magaly Brito, SEPPA ta lamenta cu un documento cu fecha di 17 di Mei ta wordo uza door di Lampe como argumento of motibo, pa cual e mester a pasa OAA bao di e Stichting di EPB.
“Nos ta lamenta cu mientras cu nos tabata sinta na mesa habri y dispuesto pa discuti riba tur e informacion y dialoga pa yega na un entendimento, pafo ta sali un documento cu na ningun momento tabata parti di e discusion”.
Den e reunion aki tambe nos a informa e minister cu mientras cu e ta usando e declaracion di un accountant of un investigacion cu lo a tuma lugar, e no a bisa cu esaki ta core den un periodo hopi mas prome, cu ora a tuma e decision pa OAA funciona diferente, segun Brito.
El a sigui bisa cu di e forma aki esaki ta atacha nomber di e trahadornan, kendenan bao di tur e frustracionnan cu e minister a causa, ta sigui traha y bringa pa existencia di OAA.
Tambe nan ta bringando pa mustra su balor y derecho di existencia.
Brito a sigui bisa cu cada dia tin un cantidad di hende cu ta sigui acerca OAA pa tuma curso y sigui un opleiding pa prepara y forma nan mes pa bay dilanti.
“OAA tin tur capacidad y tur material di scol disponibel, cu tur posibilidad pa brinda nan locual nan tin mester pa profesionaliza nan mes riba mercado laboral”.
Nos ta haya cu e manera di proceder di e minister pa bin cu un rapport pafo di tur reunion y discusion mientras cu nos a pidie pa sinta na mesa, no ta un manera etico pa trata e trahadornan aki, segun Brito.
El a sigui bisa cu mester coregi e minister y splica cu ta papiando aki di un grupo di trahador cu tey ainda y cu ta e mes a faya na diferente momento, pa por regla cosnan corectamente.
“Nos a bise cu e hecho cu e formalizacion di nan papelnan no a termina ainda, esey no ta nifica cu awor cu nan ta haci uso di esey, por haci como si fuera nan ta spirito y no ta existi”.
Bo mester ta etico como gobernante pa reconoce cu ta bo mes a pusha nan eynan y aworaki ta e momento pa regla cosnan na e manera mas corecto.
Nos ta insisti cu tur e tema di OAA mester wordo para, pa nos por clarifica e puntonan aki prome cu sigui cu cualkier plan cu lo por tin riba mesa.
Nos ta dilanti di un eleccion y posibel cambionan di un minister di Enseñanza, pues nos a pidi Prome Minister tambe pa pone un paro na tur proceso, pasobra den tur e procesonan aki tin errornan cometi, segun Brito.
