Segun varios reaccion: - ORANJESTAD (AAN) – Varios reaccion a drenta na Mesa di Redaccion di DIARIO, relaciona cu e caso di e miembro di un Iglesia,
cu kier a yega na un areglo di pago cune, riba e diezmo cu e no por a sigui paga completo, ora el a cuminza haya menos entrada, door di covid-19.
No ta un Iglesia so ta haciendo esaki. Ta varios di e agrupacionnan religioso aki tin, cu a lanta na monton rond di Aruba, na cualnan mester paga diezmo, y cu tin areglo di pago cu nan miembronan cu a pasa den problema pa paga, door di e pandemia unda tin di nan cu tambe a perde trabao.
Esaki ta un asunto cu gobierno mester controla y investiga. No ta posible cu tin “supuesto pastornan” cu ta negocia cu FE di hende. Diezmo no ta un prestamo cu un fiel creyente ta haya, pa papia di areglo di pago!
DIARIO tin entendi cu si e miembro di iglesia ta un persona cu ta gana salario minimo, si ta haya bijstand, of si ta hayando FASE, no por keda sin paga e 10% di e entrada chikito aki, pa duna e pastor. Ta masha facil pa di un dia pa otro, un hende cuminza lesa Bijbel, siñe di cabes, anto diripiente ta busca un local pa lanta un “iglesia”, tin biaha hasta den un garashi di cas, y abusa di tur e personanan cu ta kere cu e ta un bon hende, un enviado di Dios, djis pasobra nan tin sed di Dios y kier yena e bashi cu nan tin den nan curazon.
Esaki ta, simplemente, un negoshi haci usando nomber di Dios y lo ta bon pa gobierno cuminza haci control, y mas ainda si ta berdad cu e iglesianan ta haya subsidio di gobierno. Cu FE di hende no mester haci comercio, y hende ingenuo mester cuminza habri nan wowo!
Ta bon pa indica si, cu no ta tur iglesia cu ta cobra diezmo tine obligatorio. Esaki tambe a wordo comenta na Mesa di Redaccion. E miembronan di iglesia ta duna locual cu nan por, y ora nan por, y incluso durante e pandemia no a pidi nan ni un debchi preto.
