Dia 1 di September 2025 ta marca e di 65 aniversario di introduccion di pensioen di behes

Edwin Jacobs, Director di SVb:

ORANJESTAD (AAN) – Edwin Jacobs, Director di SVb, den entrevista cu DIARIO a expresa cu e aña aki ta marca e di 65 aniversario di introduccion di e fondo di pensioen di behes, cu yama Pensioen di Gobierno of Pensioen di SVb.

P’esey Dia 1 di September 2025 awo, ta un fecha cu pa SVb (Banco di Seguro Social), ta un fecha historico y importante.

“Aña 1960, dia 1 di September, tempo cu nos tabata forma parti di Antiyanan Hulandes, nos politiconan Antiyano a tuma e decision cu ta importante pa nos tin un fondo di pensioen di behez, cu ta dignifica e hende grandi, cu ta dun’e un derecho riba un entrada tur luna. Prome cu esey, nos grandinan tabata biba di caridad, di locual cu nan por a ricibi, of di loke nan mes por a spaar. Pero nos mundo tabata avanzando, Declaracionnan di Derecho Humano di 1948, a declara seguridad social como un derecho humano, y esey tambe a impulsa nos politiconan cu a forma parti di Antiyanan Hulandes a tuma e decision cu nos ta introduci dia 1 di September 1960, e sistema di pensioen di behes”, Edwin Jacobs a relata.

El a agrega cu awe, 65 aña mas leu, por mira cu e fondo aki ta hunga un papel hopi importante pa nos hendenan grandi, y asina nos grandinan tin un entrada cu nan por biba dignamente di dje, tur luna.

“Anto, nos ta kere cu no por laga 1 di September 2025 pasa, sin cu nos conmemora e fecha importante aki, pasobra ta inicio tambe di e construccion di nos sistema di seguridad social, pa nos pais y pa nos hendenan, y no por lag’e pasa sin mas”, Jacobs, a reitera.

El a añadi cu p’esey SVb tin un campaña di informa comunidad pa por conmemora 65 aña di e Fondo di Pensioen di Behes. “65 aña cu den nos bida en general tambe ta hopi importante; e fecha cu ta marca e clausura di bo bida laboral, pa drenta den e periodo di pensioen”, Director di SVb. Edwin Jacobs a señala.