Hubert Luis Tiel: Incluyendo tur camara cu el a uza
ORANJESTAD (AAN) Un bez cu tecnologia a cuminza avanza y telefon tipo smartphone celular a drenta cu su diferente aplicacion, unda awendia, entre otro, por graba entrevista, noticia, y saca potret reemplazando e camaranan chikito cu nan rol di 12 potret, sin duda a trece un cambio den e trabao di prensa sin laga nos fotografonan afo.
Hubert Luis Tiel, cu e aña aki ta cumpliendo 55 aña como fotografo, a expresa su sentimento pa cu esaki. “El a mata e buniteza pa loke ta fotografia, y hendenan cu no ta interesa pa sigui loke ta fotografia mas. Nan djis saca pa saca so. Nan no ta worry cu liña straight of liña schuins, no ta worry cu nada. Ya, e potret riba su mes no tin balor mas. Hopi di nan tin ora ta ‘save’ nan, ya nan ni ta corda kico nan ta, nunca mas a bay den file pa check kico nan ta, y esey ta lastima, pasobra tin asina tanto historia di un fotografia.
“Y atrobe biniendo bek, mi a bay traha cu camara di pelicula dos aña. E motibo pakico mi no a gusta camara di pelicula, ta pasobra den mi pensamento, ora mi uza mi camara di saca potret, mi ta dicidi ki ora mi ta freeze e momento, esey ta algo cu bo no por haci cu camara di film, pasobra e ta keda graba bay”, Hubert a splica.
Hubert Luis Tiel a haci entrega ultimamente, di tur su material, na Archivo Nacional Aruba (ANA). Mi a uza dos van pa carga tur mi cosnan, y ainda mi tin un saco na cas cu hopi documento, pero aparte di esey, hopi potret historico, mi no ta papiando di tempo di drag so, potretnan bieu cu hendenan no ta ni corda riba nan. E ora ey e fotografia ta bisa bo con importante e ta, y ki ora nan ta dun’e balor. Mi a hiba practicamente tur loke ta mi historia di 55 aña na ANA.
