Melva Croes-Yanez:
*Riba tur tereno desde banco te hospital tin abuso contra adulto mayor na Aruba
ORANJESTAD (AAN) — Melva Croes-Yanez, di Fundacion Alzheimer Aruba, siguiendo cu su entrevista cu Matutino DIARIO, a señala cu a yega na e punto unda e kier yega na comunidad, pa no tin miedo.
“Aworaki, nos a yega riba e punto cu Fundacion Alzheimer Aruba, conhuntamente cu otro instancianan, nos a cuminza aworaki uni nos grandinan contra abusonan cu ta tumando lugar, aki na Aruba. Pasobra nos ta luchando aworaki pa bin cu derechonan pa nos adultonan mayor”, Melva Croes-Yanez a subraya.
El a keda reitera cu ta mucho abuso contra adulto mayor ta tumando lugar na Aruba, riba diferente tereno, manera: riba tereno bancario, financiero, cu ta wordo ocasiona cu remedinan, y tin tambe esun cu ta wordo yama “e hangua cu ta duna nan na hospital”.
Melva Croes a bisa cu hopi di e grandinan ta bin e Fundacion denuncia esaki. “Akinan ta e puntonan cu un discusion nacional mester cuminza tuma lugar. Dus, no por ta asina cu nos hendenan ta wordo laga den un forma di incertidumbre, cu ta causa hopi mas stress y problemanan di salud, principalmente adultonan mayor, cu no por drumi anochi pa motibo di tur e cosnan aki”, señora Melva Croes-Yanez a vocifera.
