Departamento Arubiano/Caribiana di Biblioteca Nacional a ricibi buki 'E Cilinder Magico entre Aruba y Curaçao'

ORANJESTAD (AAN): Diabierna atardi, hefe di Departamento Arubiana/Caribiana di Biblioteca Nacional di Aruba,

señora Zetsia Ponson, a ricibi buki  'E Cilinder Magico entre Aruba y Curaçao' for di autornan Nidia Rosaria-Wallé y Marilyn Alcala-Wallé. Tambe presente den e conferencia di prensa tabata señor Alfonso 'Buchi' Boekhoudt.

            Esaki ta di dos buki riba historia di cah'i orgel. E biaha aki ta conta e historia di e pioneronan di cah'i orgel na Aruba.

            Segun señora Ponson, nan ta hopi contento y gradici cu nan por a haya e publicacion aki, cu lo forma parti di nan coleccion nacional, nan coleccion Arubiana/Caribiana y asina nan por salvaguardia nos herencia cultural.

            Marilyn Alcala-Wallé a indica cu e buki tabata un cooperacion cu Aruba y esaki a tarda mas o menos un aña. E buki ta conta historia di introduccion di cah'i orgel den Antias Hulandes, sigui pa Rufo Wever na Aruba, como tambe tur e pioneronan cu a sa di mantene cah'i orgel bibo, hunto cu tur su folklore y tur loke ta trata ritualnan rond di dje y nan a enfoca riba tur e aspectonan aki.

            E buki ta ilustra e diferente cah'i orgel na Aruba y sigur ta un bunita edicion pa esnan cu gusta conoce un tiki mas riba cah'i orgel, como tambe su historia na Aruba.