Consumidornan na Aruba a bira mas pesimista den e di dos trimester di 2022

Encuesta indicando cu prijs halto ta preocupando tur hende

ORANJESTAD (AAN): E siman aki, Banco Central di Aruba a duna e resultado di e encuesta di Confianza di Consumidornan pa e di segundo trimester di 2022.

   Loke a sali na cla ta algo cu kizas tabata di spera!  Consumidornan a bira mas pesimista, mirando cu e confianza di consumidor a baha cu  0,5 punto di indice te na 93,0 durante e di segundo trimester di 2022 (Grafico 1).

   Na final di e di segundo trimester, consumidornan tabata mas preocupa cu (i) e situation economico lo deteriora (Q1-2022: 59 porciento) y (ii) e posicion financiero di gobierno lo empeora (Q1-2022: 52 porciento).

   Casi tur e respondentenan (97 porciento) a raporta cu nan ta premira cu prijsnan lo ta mas halto den e proximo 6 lunanan. Mitar di respondentenan ta pensa ainda cu haya un trabao nobo ta mas dificil, esta 1 punto di percentahe menos compara cu e trimester anterior (Q1-2022: 51 porciento). Ademas, 46 porciento di respondentenan ta premira cu na cas nan situation financiero lo deteriora, esta cu 5 punto di porcentahe mas compara cu e trimester anterior (Q1-2022: 31 porciento).

   Tanto e indice di expectativa como e indice di e situacion actual a baha, esta cu 1,1 punto di indice te na 93,2 y cu 0,5 punto di indice te na 92,7, respectivamente, den e di segundo trimester di 2022.

   E cantidad di respondentenan cu a raporta cu compra di un auto no tabata conviniente a keda mescos na 69 porciento den e segundo trimester di 2022, mientras cu 67 porciento a indica cu haci un prestamo no tabata adecua (Q1-2022: 66 porciento). Tambe, 58 porciento di respondentenan a indica cu tuma un hipoteca no tabata adecua (Q1-2022: 62 porciento). Encuanto bay cu vakantie 50 porciento di respondentenan a raporta cu no tabata conviniente.

   Consecuentemente, e indice di habito di consumidor a baha marginalmente di 93,9 den e primer trimestre di 2022 te na 93,8 den e di segundo trimester di 2022.