Den secrecia Gobierno ta acorda Rijkswet cu Hulanda sin consulta prome cu Parlamento

Fraccion di MEP y PPA a entrega carta na Gobernador

*Falta di respet di Gobierno pa Parlamento a pasa limite 

ORANJESTAD (AAN): Durante un reunion den Parlamento diabierna ultimo, cu a wordo pidi pa Fraccionnan di MEP y PPA 5 luna pasa, Parlamentarionan a haya un sorpresa desagradabel ora cu Gobierno a informa cu ya a entrega Rijkswet na Rijksministerraad (RMR) y RMR a bay di acuerdo cune.

Parlamentarionan di MEP a protesta pasobra ya dia 30 di september 2022 tur e parlamentonan di Reino a palabra cu den caso cu ta traha riba Rijkswet, cu e gobierno mester ta sigur, prome cu presenta e Rijkswet y den henter e proceso despues, cu e tin sosten di e Parlamento. Den e caso aki gobierno a entrega e rijkswet sin consulta cu Parlamento prome. Esey tabata hustamente e motibo pa cual Parlamento no a sostene e otro rijkswetten den pasado. E violacion di e palabracion aki, ta un acto contra democracia di nos pais y tin e fraccion di MEP hopi preocupa.

Pa completa e acto dictatorial, Presidente di Parlamento Marlon Sneek a cera e reunion pasobra “tabata tin mucho desordo”. Esaki na momento cu fraccion di AVP a pidi pa schors e reunion te aki dos siman.

Fraccion di MEP a bisa: si AVP kier un reunion aki dos siman, e por pidi’e. Cu e Presidente ta schors un reunion cu MEP a pidi, djis pasobra AVP kier un schorsing, ta hasi e susedido den Parlamento aun mas serio.

Pa e motibo aki Fraccion di MEP y PPA a bay entrega un carta na Gabinete di Gobernador, pa su intermediacion pa salbaguardia democracia di Aruba.