*Ta importante pa baha costo pero mantene calidad
ORANJESTAD (AAN): Diahuebs director di Utilities Joseph Everon a duna un splicacion amplio riba e plannan di e compania pa awor y futuro y parti di esaki ta e maneho di desperdicio na Aruba.
Everon a splica cu Utilities ta hunga un rol hopi importante den esaki, hunto cu WEB, Elmar y AWSS.
“Nos a cuminsa aworaki cu structura con e approach ta bay ta pa bin cu un plan, pasobra nos ta kere cu nos por hunga un rol hopi importante den ‘waste to energy’, pa yuda den e problema di desperdicio cu nos tin na Aruba”.
Un enfoke grandi cu nos tin ta tambe riba e fuel.
Nos tur sa cu via e plan strategico aki nos kier purba reduci uso di fuel, pero mientrastanto cu nos ta usando fuel nos tin cu busca un manera pa tin un fuel mas pagable, pasobra esey ta traduci su mes mesora den un reduccion di tarifa y emocionnan, segun e director di Utilities.
El a sigui bisa cu ta bezig ta wak e fuel supply chain completo con ta trece fuel pa Aruba, pero tambe riba e mercado di fuel, esey conhuntamente cu RDA entre otro.
“Nos ta bezig ta wak ki tipo di fuel nos por uza pa reduci e costonan, pero tambe mantene e calidad cu nos tin”.
Unabes cu bo trece un mihor calidad di fuel, nos por mehora hopi mes den e mantencion na WEB riba nos motornan.
E parti ey ta hopi importante, segun Everon.
