Den pidjama e alumnonan di Colegio Conrado Coronel a bisa ayo na 2025

ORANJESTAD (AAN): E directorado y docentenan activo di Colegio Conrado Coronel a dicidi na organiza un actividad special den e dianan prome cu vakantie a start, unda tur alumno a bay scol e mainta ey bisti den pidjama.

   Un mainta cu a bay cu cantamento, declamacion di poesia, y tabatin hasta chens di drumi abao den klas pa asina mira pelicula.

   Alumnonan a presenta na scol den diferente pidjama trendy, y cu tema di dianan di fiesta.  Hasta Santa Claus a pasa rond di bishita.  Cada klas a organiza nan actividad na e forma cu mas nan stima, y na forma trankil a sinta come y disfruta di nan ‘Almuerzo di Pasco’.

   Por a nota cu e docentenan tambe a yega scol den nan pidjama y cu sonrisa grandi riba nan cara a atende e dia festivo aki cu a bay sumamente positivo, y muchanan cu sonrisa grandi riba nan cara.  Pabien na e organizadornan y e muchanan cu sigur stima e scol hopi mes.