Den luna di april 2022 e 'tourism receipts' a recupera 117% compara cu april 2019

Minister Dangui Oduber --- * Turistanan a laga 300 miyon florin atras den economia di Aruba

ORANJESTAD (AAN):  Minister Dangui Oduber ta mustra cu turismo ta recuperando y ta mustra di ta yegando nivelnan di aña 2019 y te hasta manera tabata e caso den luna di april 2022, Aruba su turismo a surpasa cifranan registra na april 2019. 

            Manera ta conoci aña 2019 tabata e mihor aña den historia di nos turismo. Tur e indicadornan di turismo a confirma esaki.

            Aruba a demostra un resiliencia enorme y despues di temponan dificil pa nos turismo, nos ta experenciando un bon recuperacion. Aña 2022 a habri cu e variante di omicron cu a duna nos un set back den nos recuperacion pero e lunanan februari y maart tabata lunanan hopi exitoso pa nos turismo. 

            Ta importante pa remarca cu Aruba, segun un estudio haci pa IMF ta e di dos pais den henter mundo cu mas a wordo afecta pa e pandemia. Den mesun rosea nos tin cu bisa cu Aruba ta e di 2 pais na mundo cu a recupera su turismo mas lihe. Esaki ta demostra nos forza, nos resiliencia y nos perseverancia pa recupera nos turismo. 

            Den luna di april 2022 tur e indicadornan di turismo ta señala un recuperacion fuerte. E cantidad di bishitante cu ta keda Aruba (stayover) den april 2022 a recupera cu 108% den comparacion cu april 2019.

            E revenue per available room (REVPAR) di hotelnan pa april 2022 a aumenta cu 9.1% den comparacion april 2019. E REVPAR den april 2022 tabata $259.52. Tambe e average daily rate (ADR) den april 2022 a crece cu 12.2% den comparacion cu april 2019. E ADR pa luna di april 2022 tabata $323.04. 

            Un di e indicadornan di mas importante pa midi e exito y calidad di nos turismo ta e tourism receipt. Esaki ta e cantidad di placa cu un turista ta laga atras den nos economia y ta wordo midi pa Banco Central Di Aruba.

            Den luna di januari 2022, apesar cu tabata tin e variante omicron y no obstante e hecho cu nos turismo a sufri un caida drastico toch e tourism receipt a recupera cu 80% den comparacion cu januari 2019 cual sigur tabata remarcabel. E tourism receipt a conoce un recuperacion di 132% den maart 2022 den comparacion cu maart 2019.

            Cu esaki maart 2022 ya caba a surpasa e nivel di maart 2019. Den luna di maart 2022 turistanan a laga 360 miyon florin atras den nos economia. Esaki ta sigur e nivel di mas halto pa e ultimo añanan.             Luna di april 2022 sigur pa hopi ta wordo considera un bon luna tambe pa nos turismo y economia. E tourism receipt pa luna di april 2022 tambe a yega un 117% den comparacion cu april 2019. Asina aki den april 2022 turistanan a laga 300 miyon florin atras den nos economia.

            Banco central a proyecta cu e 'tourism receipt' lo bay recupera 100% pa aña 2022 cual sigur tawata un bon noticia pa nos economia. Awe nos tin e cifra unda por mustra cu e  tourism receipt pa e prome kwartaal di aña 2022 den comparacion cu aña 2019 a recupera na un 104%.

            Minister Oduber kier a gradici ministerio di turismo, ATA, APA, AAA, AHATA , ATSA y tambe Aruba Vacation Rental Professionals pa tur e esfuerzonan cu ta wordo haci pa percura pa nos turismo sigui recupera y yega bek y surpasa nivelnan di aña 2019.

            Turismo ta nos forza y ta keda e driver principal di nos economia.