Parlamentario Shailiny Tromp-Lee (MEP):
ORANJESTAD (AAN): Diadomingo 15 mei 2022 mi a asisti na e recepcion di bon bini di e di 12 Congreso di Caribbean Organization of Supreme Audit Institutions (CAROSAI). E organisacion di e congreso ta den man di Algemene Rekenkamer Aruba (ARA) cu e aña aki ta celebra su di 35 aniversario. Na e congreso ta participa mas cu 20 pais y a inicia dia 15 di mei 2022 y lo termina dia 19 di mei 2022.
Durante e recepcion aki a hiba palabra Señora Xiomara Croes-Williams, presidente di ARA, Presidente di Parlamento, sr. Edgard Vrolijk, Minister President sra. Evelyn Wever-Croes. Un atardi-anochi hopi ameno caminda por a sera conoci cu representantenan di diferente pais y intercambia pensamento y experencia. Sigur durante e combersacionnan aki mi ta subraya e importancia di ARA pa nos trabou di control como parlamentario.
Dialuna mainta, dia 16 di mei 2022, mi a asisti na apertura oficial di e congreso. E mainta a habri cu un bunita parada di bandera di e paisnan cu hunto ta forma CAROSAI. Despues nos himno Aruba Dushi Tera a keda canta pa nos artista Edjean Semeleer. Na e apertura a hiba palabra Minister President sra Evelyn Wever-Croes, sra. Xiomara Croes-Williams, presidente di ARA y por ultimo sr. Deodat Sharma, presidente di CAROSAI. Hopi atencion a keda poni na e pandemia y su impacto riba nos isla, tambe a elabora riba SDG y su ultimo desaroyonan aki na Aruba y mas cu claro riba e trabou importante y esencial di ARA.
Dia 7 di augustus 1988 a establece CAROSAI na Trinidad y Tobago. Un organisacion caminda ARA-nan di diferente pais ta miembro. Desde 2019 Algemene Rekenkamer Aruba ta ocupa e vice-presidencia. E aña aki ARA Aruba lo tuma over e presidencia di CAROSAI pa un periodo di tres aña y lo mester scoge un vice-presidente nobo. Presidencia lo ta den man di sra. Xioamra Croes-Williams.
E programa di e congreso ta uno amplio cu a inicia diadomingo caba cu un master class: ‘Speaking truth to power and the media!’. E siman ta yena cu presentacion y panelnan di discussion y ta culmina dia 19 di mei cu un tour caminda tur participante por sera conoci y experiencia nos dushi isla.
Mi kier a desea ARA Aruba tur clase di exito y mi ta sigur cu e congreso lo ta uno fructifero pa tur e participantenan.
