ORANJESTAD (AAN) – Minister di Economia, señor Geoffrey Wever, a yama un conferencia di prensa cu a tuma lugar na Culture Café, na San Nicolas,
den cual a elabora tocante un Conferencia Cumbre, cu su persona hunto cu varios partner ta organizando y cu ta dirigi na hubentud, specialmente di San Nicolas.
E mandatario tabata acompaña cu partnernan cu a yuda organiza un Cumbre, dirigi na e hobennan, titula: “Youth Entrepreneur Summit” (YeS), y lo tuma lugar na San Nicolas.
Tabata presente Endrah Gumbs, di Kiwanis Club San Nicolas; Louella Croes di IDEA, Olivier Vieira di Qredits, y Jeremy Croes di Spinup, cu ta e partnernan den e organizacion di dicho evento.
“Nos a dicidi di bin cu un evento di dos dia, dirigi na nos hubentud, pa inspira nos hobennan, vooral esnan den e area pariba di brug, cu kizas tin e idea, entusiasmo y gana pa un dia tin nan propio empresa, y cu ta mira e potencial economico di e area aki di nos Isla”, E dignatario a señala.
Minister Wever a splica cu basicamente, nan ta bay yuda e hobennan pa haya experiencia y mustra nan e oportunidadnan cu tin. Nan a scoge pa un evento di dos dia; den e prome dia ta bay tin discursonan, unda nan a invita un orado internacional cu a skirbi un buki yama “Digital Intelligence”, ken ta bay splica e hobennan con pa haci negoshi den e era digital aki. Ta bay tin mas orado. Pa e dia aki tambe a invita Tristan Every, cu ta un empresario local hoben cu tin diferente idea, diferente empresa, y cu tambe ta bay papia cu e hobennan participante.
E mandatario a sigui bisa cu e di dos dia ta dirigi na e parti interactivo, unda ta bay organiza varios “brainstorm Sessions” den cual ta bay laga e hobennan participa den tayernan di trabao, unda no solamente nan ta bay ricibi informacion di un banda, pero tambe laga nan participa activamente y siña habilidadnan.
“Pasobra despues di e evento aki, ora nan bay cas cu un set di ‘skills’ cu ta yuda nan pa dia di mañan, cu nan kier ta empresario. Nos ta pensa cu e area pariba di brug tin un potencial economico grandi, y nos ta kere cu e añanan nos dilanti e area aki ta esun di desaroyo pa nos Isla”, Minister Geoffrey Wever a expresa.
El a acentua cu mester crea lidernan local nobo y pa haci esey mester inverti den nan, inspira nan, y pa e motibo ey a dicidi di organiza e “summit” aki, cu ta un proyecto den diferente otro proyecto, pero esaki ta e principio unda cu e mandatario y e partner kier compromete cu nan y scucha nan ideanan.
“Pasobra hopi biaha ideanan economico ta sali for di mentenan creativo. Pero mentenan creativo mester wordo inspira y esey ta e obhetivo di e summit aki”, Minister di Economia Geoffrey Wever a indica.
