Delegacion Hoben di Aruba a bishita Comision Europeo

ORANJESTAD (AAN): Den cuadro di e Comision Europeo su iniciativa ‘Overseas Countries and Territories Youth Network’ (OCT-YN),

tres representante hoben di Aruba a bishita Brussels pa explora e funcionamento di institucionnan Europeo. Esaki ta forma parti di e hoben nan mandato di 1 aña unda nan lo atende algun webinars pa profundisa nan conocemento y competencia tocante e Union Europeo (EU). Ademas, lo facilita varios sesion di dialogo hunto cu lidernan politico principal di EU y brinda e oportunidad pa sera conoci cu hobennan di OCTs cu ideanan similar.

            E islanan den Reino Hulandes tin e status di Overseas Countries and Territories (OCT), conoci como ‘pais y teritorionan ultramar’ na Papiamento. E status aki ta conta pa e Aruba, Corsou, Sint Maarten y e islanan BES (Boneiro, Sint Eustatius, Saba). Pa cu esaki e Comision Europeo a selecta un cantidad di representante pa cada OCT. Un total di 25 hoben ta forma parti di e OCT Youth Network, biniendo di OCTs asocia cu tres diferente estado miembro di e EU. Aruba su representantenan pa 2023-2024 ta: Delaiah Tromp, Aïsha Romero y Mauriëlle Tromp.

            Durante e siman di 9-13 di october, e delegacion a bishita y asisti diferente reunionnan. E grupo a haya e oportunidad di reuni cu Comisario Europeo Jutta Urpilainen, kende ta encarga di e Directorate-General for International Partnerships (DG INTPA). Adicionalmente a sera conoci cu e DG INTPA Youth Unit y sra. Ann Philipps kende ta Presidente di e Comision Ehecutivo di e Overseas Countries and Territories Association (OCTA).

            E delegacion a atende un sesion informativo na e Comision Europeo, unda a ricibi informacion tocante e rol di e Comision Europeo den e Union Europeo. E grupo a atende sesionnan interactivo unda a informa di e posibilidadnan cu hobennan na Aruba por solicita p’e dentro e cuadro di educacion y formacion. Esakinan ta entre otro: DiscoverEU, Erasmus, European Solidarity Corps, y e Blue Book Traineeship. Adicionalmente a haya informacion tocante e fondonan cu Aruba ta bin na remarke p’e den cuadro di e iniciativanan di Union Europeo, por ehempel e programa ‘BESTLIFE2030’.

            E bishita pa Brussels tabata uno fructifero. Durante e proximo aña, Aruba su representantenan lo sigui comparti informacion/oportunidadnan cu e Union Europeo ta brinda pa e paisnan y teritorionan ultramar. 

            Pa mas informacion tocante e Overseas Countries and Territories Youth Network (OCT-YN), bishita e website di e Comision Europeo na Overseas Countries and Territories Youth Network (europa.eu) y e pagina di Instagram di OCT-YN Aruba na @aruba.octyn.

            Sera conoci cu tur 25 miembro di e OCT Youth Network: Members of the Overseas Countries and Territories Youth Network (europa.eu).