ORANJESTAD (AAN)—Fundacion Hende Homber a celebra su di dos lustro di a wordo lanta.
FHH a cuminza na aña 2013, y si lanzamento tabata un alivio pa hende homber, pasobra ya caba Aruba tabata conoce Fundacion pa Hende Muher den Dificultad.
Asina e vocero di Fundacion Hende Homber, señora Morgan Arrindell, a expresa na apertura di e celebracion. El a splica cu e motibo primordial pa a lanta e fundacion aki, tabata cu hopi atencion tabata wordo duna na e ser femenino, pero ora cu caba di trata e ser femenino, esaki ta bay cas bek, pero ningun hende tabata duna e ser masculino e atencion cu e merece.
“Mundialmente, e relacion di pareha ta haya hopi atencion pa e ser femenino, masha tiki atencion ta wordo duna na e ser masculino. Personalmente, mi a check tambe riba e website di Nacionnan Uni, y den un paragraph so nan ta haci mencion di e situacion tambe di hende homber cu ta bira victima di abuso y maltrato, di violencia domestico y relacional, kizas eynan, nan a dedica poco atencion riba e materia aki”, Arrindell a menciona.
Morgan Arrindell a acentua cu e materia aki merece di hopi atencion. No solamente pa un organizacion sino pa cada ciudadano den nos comunidad, “Mi kier a expresa mi palabranan di felicitacion, pasobra den e trayectoria di diez aña cu Fundacion Hende Homber tambe tin hende muher envolvi cu ta bin pidi ayudo, pasobra nan ta wak con e situacion di hende homber ta y viceversa. Esey pa mi ta un adelanto, y ta algo cu mester a wordo haci no di awo, pero di hopi tempo caba”, Morgan Arrindell a señala.
El a agrega cu e intencion nunca ta pa crea separacion den e pareha, sino pa preveni un divorcio, of cu den e relacion e situacion di comunicacion y intercambio sigui escala y conduci na separacion.
“Pues, pa mi mirando bek e diez añanan di existencia di e Fundacion Hende Homber, mi por bisa cu nan ta den un caminda positivo den e comunidad Arubiano, door di purba di celebra, conhuntamente cu prensa, cu dia 1 di November nan a cumpli diez aña di existencia”, Morgan Arrindell a indica.
