Delegacion di 30 persona entre hoben y adulto a biaha pa Roma pa participa den e Hubileo 2025

ORANJESTAD (AAN) Un delegacion di hoben di Aruba, a biaha pa Roma, Italia, en ocasion di e Hubileo 2025 cu Iglesia Catolico ta realiza cada 25 aña.

Prome cu subi avion yena cu emocion, Shavi Danje, un di e miembronan di e delegacion, a duna DIARIO informacion tocante e biahe aki.

Ta trata aki di un grupo grandi cu ta consisti di 30 persona, entre hoben y adulto. E hoben a splica cu cada 25 aña tin Hubileo convoca pa e Sumo Pontifice.  “E aña aki, nos a haya oportunidad pa bay, pa experiencia kico ta hubileo, pero e no ta solamente bay un vacancy, sino mas bien peregrina.

Peregrinacion ta bay den canamento, reza, tin momentonan den oracion, bishita diferente caminda. E hubileo ta tuma lugar di dia 27 di Juli pa 3 di Augustus. E ta un evento tremendo, casi manera e Jornada Mundial di Hubentud.

Nos ta yama danki di curazon na e pueblo di Aruba, cu a yuda nos cu donacion di loke cada ken por a aporta. Tambe nos ta gradici tur e sponsornan cu a yuda nos cu actividadnan, e pastornan tambe, y lidernan di diferente grupo y a motiva e hobennan, pasobra sin nan motivacion kizas nos a pensa cu nos no ta bay logr’e. Si no ta pa nan y pa pueblo, nos no tabata akinan para dilanti di Aeropuerto pa bay Roma, y nos ta hopi contento.

Ora cu nos ta na Roma, nos ta bay haci diferente contenido cu nos ta bay pon’e den e pagina di e delegacion ‘Hubileo Aruba’ y nos ta bay haci diferente video. E hobennan mes ta bay take over e social media, p’asina mustra pueblo kico nos ta haciendo tambe.

“Ora cu nos bolbe Aruba, nos tin un trabao pa nos hobennan, cada hoben cu participa den e hubileo lo bin traha hunto cu e otro hobennan tambe, p’asina sigui forma hobennan nobo, den nan Fe, den Iglesia Catolico. Ora nos yega Aruba ta cuminza invita hobennan pa comparti loke Iglesia Catolico tin pa nan”, Shavi Danje a indica.