Un obra literario Hulandes a entrega e historia e berdad di Pesca
- Dedicacion special na piscadornan perdi di un sobreviviente di laman
- E otro cara di laman cu ta base di cuminda y entrada turistico di Aruba
ORANJESTAD (AAN) Uno di e obranan clasico di literatura Hulandes ta hiba e nomber di “Op Hoop van Zegen”, cu ta describi bida di un familia di piscador na Hulanda.
E storia ta presenta Kniertje como mama di Berend, cu no kier subi laman cu ya a reclama varios bida den su familia. Su mama ta exigi pa e bay traha a bordo di e barco cu e nomber “Op hoop van zegen” (Den nomber di Bendicion) y finalmente e ta bay.
Kniertje ta wordo confronta cu maleza y ta ricibi asistencia di bisiñanan cu hunto cu Kniertje ta presenta na lectornan e realidad di bida duro di un piscado. Nan ta conclui cu e prijs di bida di un piscado ta sumamente halto.
E exigencianan pa piscadornan por entrega pisca na publico ta sumamente halto loke ta wordo conclui den e ponencia cu e prijs cu bida ta exigi di hende pa come pisca, ta uno sumamente halto.
Simannan despues Kniertje ta wordo confronta cu e prijs final di e trabou di su yiu Berend como piscador, cu nunca mas lo bolbe cas pasobra e ta bira victima di e furor di laman.
Di e forma aki, literatura Hulandes ta entrega mundo henter un realidad cu te awe ta bibo y ta causante di uno di e dolornan mas grandi cu ta e perdida di bida di un piscador.
Economia di Aruba ta basa ariba laman cu ta entrega Aruba un beach cu fama mundial, turista na cantidad cu ta goza di tur loke laman, solo y beach por entrega na un forma unico.
Kico e prijs ta realmente, solamente ta bini dilanti ora personalmente hende wordo confronta cu e realidad di piscadornan, cu ta bandona e suela caminda nan por cana sin miedo, pa subi un laman cu ta completamente diferente na e atraccion di beachnan cu ta atrae turista.
Mi a lanta y crece como mucha directamente den vecindario di laman, cu su holor, su sonido y tur su realidadnan, peligernan.
Ora laman ta parce sumamente trankil, realmente e ta adverti cu mal tempo ta na caminda ora e bolbe cu su furia y olanan diripiente cuminsa spat for di otro.
Demasiado bez hende ta ignora e peligernan di laman pa concentra riba peligernan di aviacion, cu ta obliga hende pa e motibo cu e no por cana den nubia, di mira peligernan cu ta existi.
Pero laman tin peliger enorme na prome lugar pasobra ta ignora peliger enfrente laman loke ta haci cu hopi bez usuarionan di boto no ta mira e peligernan mas grandi di laman, cu ta exigi bon guia y contacto cu autoridadnan mescos cu ta wordo mantene den avion.
Con peligroso laman por ta y kico ta e berdad di perde ariba laman, ta mi propio experencia como persona cu continuamente tabata disfruta di laman.
Hamas lo mi lubida e dia, cu nabegando ariba un yate cu amigonan, mi a perde ariba laman.
E problema mas grandi di laman ta, cu e ta inmenso y cu ningun caminda tin borchi pa bisa bo unda bo ta. Bo ta depende di bo instrumentonan di nabegacion, di bo contacto cu tera y tur medio di seguridad bo por tuma.
Mi a wordo bendiciona e dia cu un yate ariba cual continuamente nos grupo a nabega, a ripara pa e momento pa nos alcansa haf mester a yega pero nos no tabata mira nada di costa.
E capitan profesional di e yate a ripara cu algo a pasa cu su instrumentonan y mester a anuncia cu nos tabata perdi riba laman, mientras ya atardi tabata prepara pa bira anochi.
Dificil pa bisa kico bo ta sinti, ora diripiente bo no por mira futuro imediato mas. Nos suerte tabata cu amigonan cu tabata spera nos, a subi laman na ciere di dia y a cuminsa cu buskeda. Pero a dura horanan largo prome cu nan a descubri nos pa asina guia nos na haf sigur.
Pero ademas di suerte nos tabata e bon preparacion di un viahe, den contacto continuo y guia cu mescos cu den un avion a bordo di tur embarcacion mester ta presente y cu ta decisivo pa bida of morto
Den e horanan aki e laman dushi cu tabata nos placer, a bira un forza di teror. E furia di olanan ta inexplicabel.
Scuridad tabata e unico realidad hunto cu e instrumentonan a bordo den e guera cu elementonan natural.
Awe cu otro bida mas ta na disputa y famianan ta yora den nan dolor, laga nos para keto na e peliger cu laman ta presenta y cu nos mester confronta eliminando tur peligro cu por bira realidad amargo y ta pone hende perde lucha contra naturaleza.
Mi a scapa. Mi a sigui biba cu e experencia di un lucha contra naturaleza.
Aruba a drenta e epoca di vacacion, cu ta tambe e epoca di calor. Awe laga nos reconoce e peligernan di naturaleza y no tuma ningun riesgo.
Laga nos yama danki na piscadornan, cu ta entrega cuminda cu laman ta produci na Aruba y duna sosten na familianan cu ta yora e incertidumbre entorno e piscadornan cu ainda no a bolbe cas.
Jeannette L. (Jenny) Cratz
