Ainda Rancho no tin atencion di Gobierno nobo ni sa ainda den ki direccion e ta bayendo

Director Clifford Rosa di Stichting Rancho:

ORANJESTAD (AAN) Señor Clifford Rosa, Presidente di Stichting Rancho, a concede un entrevista na Matutino DIARIO, den cual el a cuminza expresando: “Nos no tin un solucion nos so”, relaciona cu su pregunta: “Ki dia tin solucion pa cuido di material historico, manera e fornu situa den Ranchostraat. Esaki ta inclui e limpieza cu ta programa y structura pa instancianan concerni haci, pero cu ta sosode manera mester ta.

   “Como fundacion, nos ta haciendo esaki boluntariamente, y naturalmente tin gobierno nobo, bo ta sinti e biento ta fresco, pero ainda nos falta e atencion, pasobra nos no sa den ki direccion e gobierno ta bayendo, y den e caso ey nos a puntra: kico nos por haci? Anto, locual nos por haci ta informa via social media con nos situacion ta, no solamente pa nos haya atencion, pero e bario mes den su totalidad”, Clifford Rosa a señala.

   Clifford Rosa a indica: “E fundacion a acerca gobierno sigur, a informa e minister directamente, pero atrobe… ‘gobierno su man ta yen, hopi cos pa haci, situacion di Aruba no ta canta macaco, manera nan ta bisa…’ pero nos aki banda ta wak un crusero ta aden, e tin di haber cu turismo, pero nos mester stop di pensa solamente den traha pa turismo, y traha pa nos mesun hendenan”, Rosa a vocifera.

   Tocante e hecho cu aki poco siman e temporada halto ta drenta, a expresa: “No ta tur aña nos tin cu bolbe ripiti cu e season ta yega y cu nos tin cu bolbe prepara, bolbe haci cos…no ta cuestion di season. E ta automatico y structuralmente. Locual cu nos ta purba ta tin algo sostenible, pero atrobe, sin subsidio! Un fundacion sin subsidio no por haci mucho cos”, Clifford Rosa a remarca.

   El a bisa cu e fundacion no ta compronde kico ta sosode cu e limpieza, pasobra tin biaha nan ta yama Serlimar, pero nan ta bisa cu ta DOW, di DOW ta manda nan bek pa Serlimar, y asina aki nan por keda draai.

  “Na final nos ta yama Bureau City Inspector, nan ta bin y haci e limpieza, pero atrobe, e no mester t’asina.  Si cada biaha nos tin cu bin dilanti, e inkietudnan ey nos ta haya cu no ta na su lugar, pasobra nos kier pensa con nos ta sigui traha cu Fundacion Rancho, pa futuro.”

   “Nos a caba di haci cierto afspraaknan y nan tin cu cumpli cu nan. Pero esey ta pa nos garantiza cu Stichting Rancho keda funciona, y si e no ta funciona nos no por sigui haci e trabao cu boluntariamente y gratuitamente nos ta haciendo pa Rancho y tambe pa Oranjestad”, Clifford Rosa a señala, finalmente.