Defensa Hulandes tambe a drenta den accion pa sostene Aruba y Curacao durante e maltempo

ORANJESTAD (AAN): Riba Diaranson, tanto autoridadnan di Aruba como di Curaçao a haci un peticion na Defensa Hulandes,

pa duna nan sosten pa cu e pasada di e Disturbio Tropical cu a pasa atardi y anochi pazuid di e islanan.  Defensa Hulandes a coopera mesora, y a pone personal y material disponible.

   Na Aruba a pone 50 militar y material riba stand-by pa asina sostene autoridadnan local cu e.o. capacidad di transporte, asistencia na e personal di rescate, y tambe entrega di material losgistico.

   Na Curaçao a pone algun militarnan di e isla (CURMIL) bay funciona hunto cu oficialnan di Cuerpo Policial Curaçao.  For di 4 warda di distrito di Polis, a subi caya haci patruyahe cu e meta pa haya un bista con e situacion ta desaroyando, pa asina e centro di crisis di Cuerpo por reacciona mas adecuado pa saca material y personal unda cu esey ta necesario.  Tambe nan ta cla pa yuda den evacuacion di hende y material, transporte di cualkier herido, ehecucion di tarea di transporte, y hasta yuda controla trafico, y mantene ordo publico.

   Pues por compronde cu cada isla mes tabata ehecuta e coordinacion principal, y dunamento di ordo.  Y Defensa simplemente tabata sostene unda cu ta necesario, cu personal y material.  Y si acaso e situacion a empeora, nan por escala e material necesario di Defensa.

   Ta conoci cu e sosten di autoridadnan local ta un di e tres tareanan principal di Defensa Hulandes.  Y nan ta mustra cu semper nan tey pa yuda asina cu un tormenta pasa sea riba e islanan aki of na otro.