*Scolnan ta habri awe diabierna 1 di juli
*Diahuebs 12' or di merdia, a kita tur medida
ORANJESTAD (AAN): Despues di sali di e ultimo reunion cu Crisis Team, Prome Minister Evelyn Wever-Croes den conferencia di prensa cu a tuma luga na oficina di Bureau Rampenbestrijding (BRA), a anuncia cu ayera diahuebs, desde 12' or di merdia, a kita tur medida cu a tuma pa cu e mal tempo anuncia y ta bay bek na normalidad.
“E palabranan cu Aruba, Corsou y Boneiro a scapa ta palabranan cu mi kier a scucha desde inicio unda cu a mira cu e tres islanan aki den Caribe tabata menasa di por a wordo alcansa pa e tormenta”, Prome Minister a expresa.
Diahuebs 12' or di merdia, a kita tur medida. Sector comercial ta funcionando y ta bek na normalidad. Sector publico ta haciendo trabaonan di setup bek di sistemanan pa asina diabierna por duna servicio sin interupcion.
Pa loke ta trata scolnan, na prome instante a wordo anuncia cu lo cera diahuebs y diabierna. Esaki no ta e caso mas mirando cu no tin necesidad pa tene scolnan cera diabierna tambe. Crisis Team tabata tin contacto cu schoolbesturen y mayoria a indica tambe cu nan por cuminsa scol diabierna mes tumando cuenta tambe cu nan tin hopi trabou pendiente.
“Mi ta gradici tur ciudadano di nos pais, cu apesar di tabata den momentonan dificil, pa sector comercial cu mester a cera negoshi, y pa ciudadanonan cu mester a keda paden, pa muchanan cu no por a bay scol, y cada ciudadano cu nos comportacion civico, nos a cumpli manera e reglanan a wordo stipula. Y nos a keda ‘safe’ pa asina awe nos lanta bek y sigui den recuperacion”, Prome Minister Evelyn Wever-Croes a expresa.
