Avion Emtrasur den beslag pa 3 siman caba
ORANJESTAD (AAN): Ainda e avion Boeing 747-300M di Emtrasur ta den beslag na e aeropuerto cerca di Buenos Aires na Argentina. Esey ta bin debi cu nan a investiga con bin tin varios sospechoso Irani abordo di e avion di carga cu a yega eynan cu hopi pieza di auto.
E compania Emtrasur mientras tanto a bisa cu e personanan Irani ta abordo di e avion debi cu nan ta “dunando les” na e venezolanonan con pa opera e avion grandi di carga.
Emtrasur ta un aerolinea nobo crea door di regimen di Nicolas Maduro, y nan a pusha esaki bao cocodek di e aerolinea existente Conviasa di Venezuela.
Autoridadnan na Argentina a confisca tur paspoort y a cuminza investiga, y a bin haya sa cu un di e Irani aki ta un persona clave den mundo di terorismo subsidia pa Gobierno di Iran.
Pero awor a sali na cla, cu di aña 2011 caba, Argentina a yega di publica un informe encuanto descubrimentonan cu Conviasa tabata haci vuelonan regular pa Damascus y Tehran, y cu network di Hezbollah ta usa e vuelonan y otronan pa transporta personal den lucha, esnan cu wordo recluta, y cargamento tambe, sea paden of pafo di e region.
Na comienzo di siman, Emtrasur a insisti cu e tripulantenan deteni na Argentina, “no tabatin intencion scondi ni nada scur cu nan”. Segun e manager di Emtrasur, esta Victor Perez Gomez, nan a mustra autoridadnan tur prueba di nan trabao. E avion a wordo controla y no a haya nada cu ta di hala atencion.
Pero keto bay pa 3 siman caba, e avion di Emtrasur ta staciona na Aeropuerto Internacional di Ezeiza.
Na luna di Mei, e avion a haci movimentonan sospechoso tambe na Paraguay, unda el a busca un cargamento grandi di sigaria, cu el a transporta despues pa Aruba. Na Aruba, e avion a baha y subi bek, y ningun revision extenso a wordo haci aki. Despues cu e caso a bira conoci, Gobierno di Aruba a pone e avion aki riba blacklist.
Prome cu e avion aki a cuminza bula cu e nomber di Emtrasur, e tabata opera pa Mahan Air di Iran, cual aerolinea ta wordo domina como amical pa teroristanan, pasobra Mahan Air tabata costumbra di transporta arma, personal, equipo, y recurso na e gruponan di terorista.
E 14 Venezolano y 5 Irani ta ainda den un Hotel cerca di Aeropuerto na Argentina, pero nan pertenencia y paspoort ta confisca door di Husticia Federal.
