Defensa den Region Caribe ta reforza lasonan cu Colombia

ORANJESTAD (AAN):  E barco patruyero den Region Caribe Hulandes, Zr.Ms. Groningen, siman pasa a haci un bishita na Cartagena, Colombia.

E bishita aki den haf tabata den e luz di preparacionnan di ehercicionan maritimo conhunto, ademas asina fortalece e cooperacion den e ambito di siguridad den Region Caribe.

                E barco di Marina Hulandes  Zr. Ms. Groningen y e barco Marinero di Colombia ARC Victoria, hunto a bandona e haf di Cartagena riba Diahuebs 21 di September. E dos barconan a haci ehercicionan maritimo riba laman grandi, tal manera test habilidadnan basico di comunicacion y ehercicionan di maniobra. Ta di prome biaha, despues di un tempo largo, cu un barco Hulandes y uno di Colombia ta eherce operacionnan asina intensivo cu otro.

                E Comandante di Forzanan Naval den Region Caribe Hulandes, Comandante Walter Hansen, prome cu e ehercicionan, a organiza un recepcion abordo di e barco patruyero. E huespednan a forma un grupo diverso procedente di tanta Marina di Colombia, autoridadnan y companianan local, como tambe representantenan di negoshinan y e comunidad Hulandes na Cartagena. Ademas Comandante Hansen por a sera conoshi cu e tripulacion di e barco patruyero.

                Colombia ta un partner strategico importante di Reino Hulandes den Region Caribe Hulandes. Delincuencia transfronterizo, incluyendo contrabanda di droga, tin un efecto hopi destabilisador y halto den paisnan di Region Caribe.    Colaboracion intensivo entre Colombia y Reino Hulandes ta contribui na promocion di seguridad y stabilidad internacional den e region. Esaki ta un di e tres tareanan principal di Defensa.