Noemi Haddock, di Tienda di Educacion:
ORANJESTAD (AAN) – Den entrevista cu Noemi Haddock, di Tienda di Educacion, relaciona cu e vacacion escolar di October, cu ta otro siman, el a trece como mensahe pa mayornan pa keda duna structura y esaki por wordo duna door di wak un caminda fiho pa nan muchanan bay, y pa nan tin reglanan, por ehemplo bay drumi na cierto horario. Noemi a enfatiza hopi si, cu e mayor ta esun cu ta responsabel pa guia e muchanan sea nan ta keda cas den vacacion of ta bay un camp, of keda cu un familiar, etc.
El a expresa cu tin vacacion no kiermen cu tur cos por ta “free for all” sino cu tin reglanan na cas. Por ta nan por drumi mey ora of un ora mas laat cu tempo di scol, pero no laga nan drumi laat den madruga unda nan no tuma suficiente sociego.
Si nan ta bay un camp wak cu nan tambe tin structura, cu por wak bon pa e yiunan. Tambe percura pa e muchanan haci sikiera un par tarea di scol, y no cu pasobra tin vacacion, kiermen cu no tin nada mas di haci. Asina ora tin scol bek, tin biaha nan tin tools, nan por ta up to date ainda.
Noemi a comenta cu por ripara enberdad, cu e teeners no tin mucho cos di haci, y nan ta kere cu nan ta mucha grandi cu no mester di hopi guia mas, y cu nan ta responsable, pero e mayornan tin cu keda responsable pa e hobennan aki, cu ta den nan pubertad y adolescencia y cu por tuma algun responsabilidad si nan keda un rato na cas nan so, por ehemplo cushina algo pa nan mes, pero no por tuma tur e responsabilidad; toch ta mayornan tin cu keda responsable di nan, door di keda papia, stimula principalmente, duna apoyo, y guia. Keda papia ta algo masha importante pa e muchanan aki.
