Declaracion di impuesto 2025 lo ta completamente digital

Minister Geoffrey Wever ta declara:

• Ya 95% comerciante sa haci esaki
• E reto ta keda den declaracionnan personal 

ORANJESTAD (AAN) Minister Geoffrey Wever, Titular di Economia, Finanzas, Sector Primario, den entrevista cu DIARIO a menciona cu Aduana a haci un “inhaalslag” hopi grandi, por ehemplo den e parti di Landspakket e obhecionnan a bay na un forma hopi acelera y el a wak esakinan, y ta impresionante con lihe un obhecion ta wordo procesa. “Mi ta kere cu tin hopi adelanto den e parti di digitalizacion. Tin algun proyecto mas den pipe-planning, y e intencion ta pa e declaracion di impuesto pa 2025, lo ta completamente digital, y e retribucion tambe lo ta mucho mas lihe”, segun e mandatario.

   El a señala cu esaki ta un proyecto cu gobierno ta trahando riba dje, y cu tambe lo kita un poco di peso na e departamento y lo acelera e proceso. “Mas lihe bo por haya bo aanslag y bo restitucion en caso cu bo tin derecho riba esaki” el a reitera.

   El a agrega cu esakinan ta algun di e proyectonan cu tin ora cu, door di digitalizacion bo por yega  hopi leu, por trece cambionan structural den e proceso y ta algo cu nan ta trahando riba dje.

E mandatario a indica cu 95% di e comerciantenan sa con pa haci esaki pero realmente ta keda un hecho, cu den e parti di declaracion di impuesto personal e ta mas challenge, pasobra hopi hende no ta haci uso di e tecnologia ainda, of tin menos acceso na esaki, kizas e emigrantenan, y esaki mester wordo guia den e proceso.

   “Parti di e proceso di digitalizacion lo ta tambe e ondersteuning y begeleiding di esnan cu no por, cu no tin acceso na computer. Por ehempel, ta bay tin dianan special pa nan cu nan por bin haci nan declaracion online cu ayudo di empleadonan di Departamento di Impuesto”, Minister Geoffrey Wever a declara.