Gasto pa adaptacion comunidad por conoce aceleracion importante
*Petroleo lo no subi te 100 Dollar pero lo por baha te 50 Dollar pa baril
*Caida di prijs di petroleo lo aumenta uzo di petroleo den mas calor
ORANJESTAD(AAN)—For di prome cu mundo a bini hunto pa dicidi cu uzo di petroleo mester yega na su termino final, e acuerdo y palabracionnan a bay perdi den e careda despues di e desastre mundial cu pandemia Covid-19 a crea.
Pero mundo mester a sigui traha ariba planificacion, cu mester mishi cu no solamente uno di e productornan economico mas grandi pero tambe uno di e ramonan di magia social y financiero mas importante na mundo.
No por deshaci di e cambio grandi cu petroleo a bira pa mundo, cu actualmente ta den un problema serio si realmente e kier for di awor cuminsa despedi realmente di petroleo.
Ultimamente e discusion grandi a bira si na 2026 mundo lo no conoce un reserva demasiado grandi di petroleo cu e resultado cu e super produccion petrolero lo afecta prijs na un forma serio.
Un discusion importante ta tuma lugar actualmente y ta haya mas seriedad den ponencianan manera di Wall Street Journal cu a mustra na salida di Augustus 2025, cu prijs di petroleo por baha pisa na 2026 y hasta lo por alcansa 50 Dollar pa baril, cu ta mitar di e 100 Dollar pa baril cu tabata wordo menciona na 2024 como posibilidad.
E crecemento enorme den produccion di petroleo lo crea un mercado satura na final di 2025 y afecta haltura di prijs pa petroleo, cu lo por alcansa 50 Dollar pa baril.
Manera DIARIO a publica recientemente, ya e prijs di petroleo produci na tanto Merca como na Europa a baha considerablemente den prijs, loke sigur ta bon noticia pa e consumidor na e momentonan aki.
Sinembargo, manera expertonan ta trece dilanti, un caida serio di prijs lo tin impacto serio ariba economia mundial y e ingresonan cu e ta produci na cantidad di pais, cu a bandona situacionnan social y financiero sumamente serio cu entrada di petroleo.
E prijs di petroleo claramente ta afecta henter economia mundial, siendo e base di gastonan pa sigur transportacion pero tambe generacion di energia, cu hende kier reduci cu entre otro bateria, pero lo tuma tempo pa reemplaza petroleo.
Con esaki lo influencia economia manera expertonan ta mustra, no solamente mester wordo interpreta como caida di prijsnan pasobra prijs di petroleo a baha, pero tambe con esaki ta bay resulta den un caida internacional di tur prijs cu ta mara na petroleo, loke ta nifica adaptacionnan den tur sector.
Na e momentonan aki un demanda halto di petroleo na 2025 ta parce di a alcansa su punto mas halto y esaki hustamente por resulta den e un situacion cu prijs di petroleo ta baha. Esaki ta nifica cu reservanan lo subi y produci e situacion cu lo crea un caida pisa di prijs di productonan petrolero cu lo afecta varios pais.
Mientrastanto inversionnan mas grandi ta wordo haci den produccion di asina yama energia limpi cu mester reemplaza petroleo. Mundialmente ta papia di inversionnan di mas cu 300 Biyon riba plataforma internacional pero mester cuminsa papia di e cambionan cu lo tuma lugar den seno familiar.
Aunke e nocion cu mester enfrenta e problema serio ta presente den comunidad, mester atende cu tur e formanan cu e ta afecta bida di hende y ta crea exigencianan di adaptacion serio den convivencia cui durante Siglo 20 a conoce cambio grandi debi na tur inventonan cu a wordo haci ariba sigur tereno industrial.
Na e momentonan aki hende mester atende un circulo vicioso. Accion di hende a produci mas calor cu awor mester di alivio y cambio grandi den comodidad cu petroleo a haci posibel.
Negoshi mundial awor ta bira e forma cu mester reemplasa negoshi cu petroleo a haci posibel.
Pero mientras ta yega na solucion, mundo a crea reservanan enorme di petroleo, loke ta haci cu por lo pronto prijs di azeta ta baha y publico por gasta mas producto petrolero cu lo baha den prijs y enbez di subi te 100 Dollar pa baril, baha te 50 Dollar pa baril na 2026.
Aparentemente hende a drenta un circulo vicioso den cual interesante ta cu actualmente produccion di energia ta sigui crece como mihor negoshi na mundo cu mester bende su azeta y na mes momento produci productonan cu lo deshaci di uzo di azeta.
