Decision pa cera completamente e brug di Rooi Afo

Peligroso pa laga auto y truck pasa riba dje

• Scheurnan a sigui bira mas alarmante den e talud 

ORANJESTAD (AAN): Manera cu DIARIO a trece dilanti comienso di e siman aki, DOW a indica cu nan lo bay cera mitar di e caminda riba Dialuna 10 di Februari 2025.

   Sinembargo vocero Elisa Chen di DOW, a indica cu na ultimo momento y den consulta cu Cuerpo Policial di Aruba, a dicidi pa no djis cera mita, pero mas bien cera henter e brug aki.

   Señorita Chen a indica, cu DOW a splica cu e motibo di e ciere akinan ta cu e caminda tin mas di 50 aña di existencia y e ‘talud’ a cuminsa kibra, haciendo cu e caminda a haya “craquele” (cuero di crocodil).

   Talud ta e muraya grandi cu ta wanta e awa den e dam, y desde aña pasa a cuminza vigil’e, debi cu a mira con e ta scheur.  Y e aña aki a nota cu e kraaknan aki a bira mas grandi.  Pa evita cu e lo por sucumbi cualkier momento, net ora cu tin auto of vehiculo pasando riba dje, a dicidi pa cer’e completamente.

   “E situacion ta tiki peligroso,” ta loke señorita Chen di DOW a splica.  Pesey a tuma e decision preventivo aki pa evita cu accident por socede den e momento cu trucknan of autonan ta pasando riba dje.

   Futuro di e Brug: Segun Elisa Chen, aworaki tin 4 opcion riba mesa pa bay tuma decision pa ehecuta uno di nan pa drecha e brug.

   El a bisa cu expertonan di DOW aworaki ta den deliberacion cua opcion lo ta mihor y mas eficiente pa haci reparacion.  Ainda decision no a ser tuma, pero ta planea pa cuminza haci e trabao durante 2025 mes.

   Kico lo haci cu e muraya cu a scheur, esaki tin di wordo dicidi ainda.  Pues ta djis ‘patch’ e kraaknan den muraya, of ta construi e talud di nobo.  Tur vangrail existente lo wordo kita, y nobo lo bin na su lugar, incluyendo palonan di luz.

   Un di e opcionnan cu tin riba mesa hasta ta encera pa e proyecto bay haci e caminda mas hancho.  Pa esaki, e plan ta pa rek e caminda pa e bira mas hancho banda pabao.

   Cunukeronan por sigui yega Dam: E vocero Elisa Chen di DOW a indica cu ta djis e cruzada riba e brug a wordo cera.  Esey kiermeen cu keto bay Cunukeronan por bin for di zuid pa asina por baha na banda y yega na e awa di Dam.

   Habitantenan ta satisfecho cu a tuma e decision aki, pasobra nan tambe por mira e scheurnan aki cu tabata sigui crece cada siman, y cu a cera e brug prome cu algo por a socede.

   Pa awor corda cu e caminda ta cera, y cu tin di haci uso di otro ruta pa bay di un banda pa e otro.

   Dianan venidero e expertonan lo sigui delibera cual di e 4 opcion lo escoge pa asina traha e plan final pa ehecuta e reparacion grandi aki durante 2025.