F.T.A ta contento di informa cu
*Proposicion a keda aproba unanimamente!
ORANJESTAD (AAN) – Na Caribbean Palm Village, na dado momento e situacion laboral a bira hopi tenso, negociacionnan relaciona cu e prome CAO cu F.T.A a pega, loke a conduci na un paro di trabao di cuater ora, unda cu e trahadornan a vocifera nan mal contento cu e forma con e negociacion a pega.
Esaki ta e update cu Presidente di e Federacion di trahadornan di Aruba F.T.A, Hose Figaroa, a duna den entrevista cu DIARIO, e siman aki.
“Di parti di e hotel no tabata kier a sigui negocia riba cierto puntonan, y despues di esey mi ta contento di bisa cu e negociacionnan a sigui. E intencion di F.T.A como sindicato no ta kibra ningun empresa, sino pa busca un manera pa e partidonan toch yega na otro y tin biaha bo tin cu haci esaki un tiki bao di presion, pero importante ta cu e dialogo a sigui, y mi ta contento di bisa cu e partidonan a yega na otro, e hotel a modifica un poco e posicion cu nan tabatin, di su banda a haci cierto movecionnan y a yega na un proposicion cual Diabierna a vota riba dje, despues y cu unanimamente a wordo acepta tambe”, Hose Figaroa a indica.
Aworaki tur e miembronan ta cla pa firma pa e prome CAO entre F.T.A cu Caribbean Palm Village, locual lo tuma lugar den e proximo dianan.
