Tisa LaSorte, CEO di AHATA:
*Pero e problema di falta di empleado a sigui crece
ORANJESTAD (AAN) – “Aña 2024, tabata un bon aña pa Industria di Turismo, y nos a cuminza 2025 tambe na un manera positivo”, asina CEO di Aruba Hotels and Tourism Association (AHATA) Tisa LaSorte a bisa, den un entrevista cu DIARIO.
“Esaki ta e prome cuartal di 2025, piek High Season ta un temporada cu semper Aruba ta haci bon den e industria, y tur hende ta bisando esey. Pero e tin su retonan si, pasobra ainda nos tin e problema cu nos tin escasez di empleado. E presion ey ta creciendo ainda, y nos no ta mirando un solucion p’e” Tisa LaSorte a señala.
El a reitera cu esaki ta crea un presion riba e servicio cu ta wordo duna, pues, e balor cu ta duna e persona pa e prijs cu el a paga.
Tin indicacion cu diferente persona (no local) cu a solicita pa trabao y a presenta su papelnan na DIMAS ta bisa cu e problema ta keda na e departamento aki y cu hopi hende cu ta pendiente di permiso ta wordo deteni. LaSorte afirma cu tin e problema aki tambe, cu e proceso pa haya permiso di trabao ta dificil.
“E ta un proceso cu mester pasa aden cu tur su derecho, pero cu no mester tuma mucho largo. Aparte cu e proceso ta tuma mucho largo, y enberdad tin algun caso unda cu e persona a hinca su papelnan aden caba, y cu pa haya su permiso e mester ta na Aruba (actualmente tin e maneho aki). Nunca AHATA ta contra ni ta critica “have having”, Tisa LaSorte a subraya. Nan kier pa tin mas have having y tur e reglanan cu falta, pero en todo caso ora cu tin mas compania pa habri y hotelnan cu ta bay habri pronto, ta nifica cu tin mas hende buscando empleado. Y loke ta pasa ta cu empleadonan ta keda move di un lugar pa otro, y e ora ey cada compania tin di menos y tambe tin companianan cu ta duna servicio na e hotelnan cu tambe mester di empleado.
Pues, Tisa LaSorte ta defini e problema di falta di empleado, como uno hopi grandi cu ta aparece den tur sector.
