Debi cu no tin mantencion por mira e Clubhouse na Parke Curazon ta deteriorando

ORANJESTAD (AAN): E ta un malesa cu pa hopi decada a bira casi un ‘normal’ cerca Gobiernonan! 

Ta construi un edificio, un parke, un scol, un policlinica den bario, pero hamas e edificio ey ta bay haya mantenimento despues.

   Scolnan nobo cu a caba di wordo construi, den menos di 1 aña tin cantidad di luz colga pafo tur na frusto, luznan cu no ta funciona mas, y rand di plafond cu ta los y cuminza bin abao.

   E ta algo cu a bira dificil pa cambia!  Djis mira aki e estado di e Clubhouse cu tin na Parke Curazon na Jaburibari.  Aunke recien a renoba e pista di bicicleta BMX cu ta algo di aplaudi, aki bo por mira e otro cara di e lugar ora cu bo keda sin mantene, keda sin chapi, y ta laga e lugar keda deteriora.

   Den fin di siman DIARIO a haya un tip y a bay mira, y a confirma cu berdad e lugar ta tur na yerba.  E murayanan tur tin verf cu ta pelando y sigur nada agradable pa bista, y tambe por pone cu e lugar ta acelera den e proceso pa deteriora.