ORANJESTAD (AAN) – E Decano di e Facultad di Art & Science” na Universidad di Aruba y di e Programa Bachelor,
“Organization, Governance & Management” Mieke de Groog, den entrevista cu DIARIO a referi na e conferencia virtual, cu lo tuma lugar dia 22 di Juni venidero entre mainta 10 or y 12 or di merdia.
Ta trata di e OGM Research Conference titula “E impacto di Covid 19: e camindanan pa recupera”, cu tambe lo ta online y gratis.
Mieke de Groog a menciona cu ya caba tin 40 inscripcion entre docente, studiantenan di e facultad, y diferente organizacion.
E conferencia aki tin e meta di haya sa kico e organizacionnan mester haci pa traha miho, despues di e pandemia, y con OGM por yuda.
De Groog a comenta cu Covid-19 a haci hopi impacto riba henter nos comunidad, gobierno, servicionan publico y priva, etc., y mester haya hopi dato, di manera cu docente y studiantenan por yuda den esaki.
Por ehemplo, nan OGM por yuda cu diferente research y tambe cu proyectonan, pero mester compronde kico e necesidad cu tin, ta encera. Tambe e studiantenan por haya nan pasantia, y skirbi nan tesis. Ademas, Universidad di Aruba tin su “Good Governance Institute”, cu tambe por haci diferente investigacion pa nan, pasobra nan ta haya hopi importante cu OGM, como Bachelor Organization, por contribui na comunidad, y no warda te cu e studiantenan ta cla pero cu mesora, nan por yuda e comunidad, for di nan prome aña di e opleiding caba.
De Groog a subraya cu pesey ta hopi importante pa nan tin hopi contacto cu organizacionnan, tanto publico como priva of NGO’s.
Cualkier organizacion por aplica pa e conferencia online aki. E dama a señala cu nan kier intercambia hopi cu e organizacionnan participante, cu e bira un conferencia interactivo. Lo tin dos profesor como orado, cu ta experto riba tereno di gobernacion y servicionan publico. Pero mester ta un “win- win situation” pa e organizacionnan y OGM su programa, pasobra e studiantenan por compronde mesora ki sosten e organizacionnan mester, y cu tur loke nan ta siña como teoria, nan por haci nan practica.
Interesadonan por inscribi via e facebook di OGM Governance & Management, unda por wak e foyeto y con pa inscribi.
