Danki na yiunan di Betico pa comparti boso tata cu Aruba

Danki na yiunan di Betico pa comparti boso tata cu Aruba

Betico tabata un tata pa henter Aruba

ORANJESTAD (AAN): Diasabra mainta 25 di januari, Dia di Betico, den su discurso durante e Ceremonia Protocolar na Plaza Libertador G.F. Betico Croes, Prome Minister Evelyn Wever-Croes a gradici tur ciudadano di nos pais pa balora e lucha di e gran Arubiano Betico Croes specialmente ta gradici yiunan di Betico pa na un edad jong a comparti nan tata cu Aruba.

   “Den su discurso na Seri Noca, un discurso cu pa hopi di nos tabata su despedida, el a dirigi su mes publicamente na su yiunan. El a bisa cu “e no ta un tata pa un hogar di mama, tata y 4 yiu, sino e ta un tata particular, un tata di henter un pais”.

   Na su yiunan Guisette, Glenbert, Junior, Glendeline, nos kier bisa un biaha mas danki pa comparti boso tata cu nos. Boso tata di berdad tabata un tata particular. Nos ta spera cu e stimacion cu nos pueblo tin pa boso tata y pa boso, por duna boso consuelo ora cu bo sinti su falta”, Prome Minister a expresa.