Ministro Geoffrey Wever:
ORANJESTAD (AAN): Recientemente Minister demisionario Geoffrey Wever a ricibi un update di e proyeccion economico pa 2024 y 2025 di Departamento di Asuntonan Economico, Comercio y Industria (DEACI). E update aki ta representa un ahustacion di e Economic Outlook 2024- 2025 publica den april 2024 y ta basa riba ultimo informacion disponibel di nos economia.
Segun e ultimo Economic Outlook 2024- 2025, DEACI ta premira cu pa 2024 economia a crece cu 6.7 porciento nominal pa yega na un balor di e producto interno bruto, e indicador pa midi actividad economico, di 7.1 miljard Florin.
Pa 2025 e expectativa ta positivo pa Aruba su economia. DEACI ta premira un crecemento nominal di 3.9 porciento den 2025 cu e producto interno bruto di 7.3 miljard Florin.
E expansion di actividadnan economico pa 2024 y 2025 ta basa riba crecemento di nos industria turistico y crecemento di consumo y inversion priva. Esaki ta demostra confianza den nos isla como destinacion turistico y pa inversion. E revision di proyeccion di crecemento di economia di Aruba ta den liña cu e proyeccion di Banco Central di Aruba y Fondo Monetario International. Banco Central di Aruba ta premira un crecemento economico den 2024 y 2025 di respectivamente 10.0 porciento y 2.1 porciento den termino nominal.
Pa facilita proyeccion di e economia di Aruba, DEACI ta haci uzo di e modelo macro-economico MARUBA. E modelo MARUBA ta basa riba e Cuentanan Anual di Pais Aruba publica pa CBS y ta refleha e funcionamento di e economia di Aruba. Maneho di e modelo MARUBA ta cay bao responsabilidad di DEACI. E proyeccionnan economico ta posibel danki na e dialogo continuo cu diferente instancianan y expertonan local, y a base di analisis di diferente desaroyo.
Ministerio di Asuntonan Economico, Comunicacion y Desaroyo Sostenibel conhuntamento cu Departamento di Asuntonan Economico, Commercio y Industria lo sigui monitor desaroyo di economia di Aruba.
Minister Geoffrey Wever kier gradici directora Maria Dijkhoff- Pita y e afdeling Economisch Beleid en Onderzoek cu ta haci e economic outlook posibel.
