Betico a construi e cas cu yama pais Aruba

E lucha di Betico Croes pa nos Status Aparte

• Pa nos nos biba den dje, cuid’e y stim’e 

ORANJESTAD (AAN): Diasabra 25 di januari, Aruba a celebra e fecha natalicio di un gran Arubiano, estadista y Libertador Gilberto François (Betico) Croes, cu a cumpli 87 aña. Gobierno di Aruba, manera ta costumber, hunto cu Comision Celebracion Dianan Nacional, a duna homenahe na e gran Arubiano aki den un forma solemn durante Ceremonia Protocolar na Plaza Libertador G.F. Betico Croes.

   Na e ocasion, Prome Minister Evelyn Wever-Croes a duna un discurso comparando e lucha di Betico pa nos Status Aparte cu e construccion di e cas cu yama pais Aruba.

   “Betico a nace dia 25 di januari 1938 den e pueblo di Santa Cruz, den un hogar humilde caminda semper tabata reina amor, disciplina, compasion y union familiar. Maestro tabata su profesion, pero bida a haci’e dirigente di su pueblo, y destino a haci cu el a bira un luchado cu a rebiba y realisa e causa di e pueblo Arubano pa su libertad.

   Sin duda cu e trayectoria di Betico Croes como politico tabata impresionante. E stimacion cu el a demostra pa su isla natal, e lucha tenaz cu el hiba pa logra e deseo di e pueblo Arubano, y tur e sacrificionan personal y familiar cu el a haci, pa logra e anhelo di nos pueblo: esta un Aruba autonomo den Reino Hulandes. 

   Un di e dichonan di Betico ta “e felicidad cu mi ta desea pa mi propio yiunan ta e felicidad cu mi ta desea pa henter e pueblo di Aruba”. Y ta esey mes el a haci, el a converti e lucha den e felicidad di nos pueblo.

   Historicamente e anhelo pa libertad a biba pa decadanan largo den curason di tur Arubiano. Lidernan politico grandi prome cu Betico a hiba e lucha. Aki mi ta referi na Henny Eman conoci como Henny biew, Juancho Irausquin, y Shon A Eman. Cada un di e lidernan politico aki, tin nan contribucion na e lucha pa nos Status Aparte, y nan contribucion cu awe Aruba ta un pais pionero den nos region. Y nos mester semper reconoce y recorda e contribucionnan aki.

   Mescos nos mester reconoce no solamente e contribucion di Betico Croes, pero tambe e gran logro di Betico Croes, nos Status Aparte. Y mas cu tur cos, su lealtad na e deseo di nos pueblo, te na final.

   Ora Betico a bolbe di su estudio na Hulanda den fin di añanan 60, el a realisa cu den pueblo ta biba un anhelo pa su libertad. Un lucha pa libertad cu e lidernan politico prome cu ne berdad a cuminsa cu ne, pero a bandona den añanan 40.

  Hopi biaha mi ta compara e lucha pa nos Status Aparte cu construccion di e cas cu yama pais Aruba. Den añanan 70 Betico a topa cu un fundeshi cu a worde cuminsa y bandona den añanan 40, y den hopi mal estado. El a drecha e fundeshi, el a caba cu e fundeshi, lanta e murayanan di e cas, e ringbalk, dak, y despues di a pone porta cu bentana, a entrega NOS e yabi, pa nos biba den e cas cu yama pais Aruba. Lamentablemente algun ora prome cu nos por a drenta den e cas, el a haya un accidente y despues di 11 luna den coma, a fayece. E mes no por a biba den e cas cu el a construi pa nos. Y ta p’esey nos mester cuida e cas aki, y stima e cas aki, cu yama pais Aruba, pasobra nos sa cu e lucha cu Betico Croes a hiba pa Aruba su Status Aparte no a bay facil y no a bay sin sacrificio. Un dicho cu Betico semper a vocifera tabata cu “No tin lucha sin sacrificio y no tin sacrificio sin gloria”. Y e logro di e lucha y sacrificio tabata Aruba su Status Aparte”.

   Na final di su discurso, Prome Minister a gradici Comision Celebracion Dianan Nacional y colega Minister di Cultura Xiomara Maduro, pa e bunita Manifestacion Cultural di diabierna anochi y e Ceremonia Protolocar diasabra mainta, na tur artista, agrupacionnan musical, y tur cu a conmemora e dia importante aki.

   “Ban hisa nos bandera y demostra nos orguyo, e orguyo cu nos pida baranca Aruba, un pais chikito riba e mapa mundial, a conoce un Lider manera Betico Croes. Feliz Dia di Betico y Cu TodoPoderoso Drama su bendicion riba nos pueblo y cu providencia sigui inspira nos pueblo pa asina nos hiba nos pueblo den e berdadero felicidad”, Prome Minister a termina expresando.